“ဆြာဒင်ရေးသားစီရင်အပ်သော၊ခေတ်သစ်ရာဇနီတိဆုံးမစာ”
(မင်းဒင်)
(ကျမ်းဦးစကား)
ဇကောနှင့်တူလှသောဗမာပြည်ကြီးတွင်၊ရာဇာတည်းဟူသောမင်းတို့၏ထင်ရာစိုင်းမှုကြောင့် ပြည်သူပြည်သားဇီးဖြူသီးတို့ ကျွမ်းထိုး မှောက်ခုံဖြစ်နေခြင်း အပေါ်၊မင်းသမ္မအစိုးရစသည်တို့ အားထောက်ပြချေချွတ်ဆုံးမရမည့်သူတို့ကား၊ မင်းဆရာဂိုဏ်းဝင်သံဃာ့နာယက အစရှိသော ကျမ်းတတ်အကျော်အမော်ထေရ်ကြီးဝါကြီးတို့ဖြစ်ချေသည်။
သို့သော်အချို့ကားလောကီထုပ္ပတ်လူတို့ဇာတ်ကိုရွံ့ရှာ၍ရှောင်ရှား၊ ရေငုံနှုတ်ဆိတ်နေကြခြင်းကြောင့်လည်းကောင်း၊အချို့ကား လင်ခရူ ဆာ၊မာစီးဒီးဘင့်စ်၊အီဆူးဇူးဘစ်ဟွန်းနှင့်၊သံဃာ့ဌာနန္တရတို့အပေါ် မက်မောတွယ်ငြိကာ၊ ဝတ္တရားပျက်လေသဖြင့် မြင်းအလုပ်ကို ငဒင် ဝင်ရှုပ်သကဲ့သို့ဖြစ်ရခြင်း အား၊နားလည် ခွင့်လွှတ်ကြစေလိုပါ၏။
(တစ်)
တေဘုမ္မာ၊ဘုံသုံးပါးတွင်အနိစ္စ၊ဒုက္ခ၊အနတ္တတည်းဟူသောလက္ခရေးသုံးပါးကို အစိုးရမင်းတို့၏ဥာဏ်တွင်မထင်၊တရားမရကြလေသဖြင့် သံသရာတွင် လည်ခဲ့ပေါင်းများခဲ့လေပြီ။ဗိုလ်ချုပ်မှူးကြီး၊ဗိုလ်ချုပ်ကြီး၊သမ္မတ၊ဝန်ကြီး၊လွှတ်တော်အမတ်စသောရာထူးကြီးငယ်တို့တွင် မက်မောနေခြင်းကား၊ကာမတဏှာ၊ ဘ၀တဏှာဟုခေါ်သော လောဘနှင့် ဒိဋ္ဌိ၊ အ၀ိဇ္ဇာအရင်းခံခြင်းကြောင့်ဖြစ်၍ သံသရာတွင် တလည် လည်မျောနေခြင်းသာဖြစ်ကြောင်း၊ရာဇပလ္လင်ဖင်ကပ်ပါလာသည့်ဟုထင်နေကြသူများကြီးစွာသောသတိဖြင့်ယှဉ်စေလိုဘိသည်။သံသရာကားသမုဒ္ဒရာနှင့်တူ၏။ ထို့ကြောင့် ယင်းတို့ကို သြဃဟု ခေါ်ချေသည်။
ထိုသြဃလေးဖြာ သံသရာသမုဒ္ဒရာတွင် မိမိတို့ကိုယ်တိုင်တလည်လည်မျောပါရုံမျှမက၊တတိုင်းတပြည်လုံးပျက်စီးခြင်းငါးပါးဆို လျက်ချွတ်ချုံကျနေရခြင်း၏ အဓိကတရားခံမှာ(၁၉၆၂)ခုနှစ်မှာယနေ့အထိ အစဉ်အဆက်သောအစိုးရမင်းတို့၏အာဏာတပ်မက်မှု တဏှာကြောင့်ပင် ဖြစ်ပေသည်။
ထို့အတူစစ်မင်းဆက်ထူထောင်လိုသူတို့၏ကာမောဃာ ၊ဘဝေါဃာ၊ ဒိဋ္ဌောဃာ၊ အ၀ိဇ္ဖောဃာ၊ စိတ်မောဟာ မကင်းရခြင်း၏လက်သည် တရားခံသည်လည်း တဏှာပင်ဖြစ်ကာ၊ ဒိဋ္ဌိဥာဏ်ဝင်လျက်၊ ငါသမ္မတ၊ငါဗိုလ်ချုပ်မှူးကြီး၊ ငါ့လွှတ်တော်၊ငါ့ပါတီ၊ငါ့အုပ်စုဟူသော၊ ငါ့မြင်းငါ ထင်ရာစိုင်းနေသည့်သက္ကာယအမြင်မှားတို့ဖြင့် မာနထောင်လွှားနေကြခြင်းကို ရပ်တန်း ကရပ်သင့် လှချေပြီ။လူဘဲနတ်ဘဲ မှတ်စွဲလို့သာ၊ မှားချက်အလွန်နာ၊ ငါ့သားငါ့ မယား လင်သားဥစ္စာ၊ ငါ့ကိုယ်ငါ့ဟာ အစဉ်မကွာ သက္ကာ ယကြောင့် မာနထောင်နေကြခြင်း သာ ဖြစ် ကြောင်းကျွဲအပါးတွင်စောင်းတီးလိုက်ရပေသည်။
(နှစ်)
အာဏာမက်မောသူအစိုးရမင်းအများစုမှာ၊သံသရာလွှတ်ကြောင်းတရားများမှဒုန်းဝေးကြသော်ငြားဝိပဿနာဥာဏ်ဝင်စားနိုင်ပါက ငါငါ ဟုစွဲနေသော၊အနတ္တခန္ဓာသည်၊ ဘာအနှစ်မျှရှာမရ၊ အ,သာရကသဘော၊ဖြစ်ရင်း၊တည်ရင်း၊ပျက်ရင်းချုပ်နေကြောင်း၊မည်သည့်အာဏာရှင်၏ရုပ္ပတိသညာမဆိုအခါမလပ် ဆိတ်သုဉ်းဖောက်ပြန်လျက်၊စကြာဝတေးမင်းပင်ဖြစ်စေကာမူ အနိစ္စတည်းဟူသောရုပ်နာမ်တရားနှစ်ဖြာမျှ သာဟုအမှန်မြင်နိုင်ကြပေအံ့။
ထိုနည်းမခြား၊ဒီမိုကရေစီစနစ်တွင် အာဏာဟူသည်ပြည်သူလူထုမှသက်ဆင်းလေရာ၊အစိုးရမင်းမှန်သမျှ၊လူထု၏အစေအပါးဝန်ထမ်း မျှသာဖြစ်ကြောင်းသတိသမ္ပဇဉ်ဖြင့်ဆင်ခြင်ထိုက်လှလေ၏။ရာဇဂုဏ်မောက်သူတို့၊ငါနှင့်ငါသာနှိုင်းစရာဟူသောစိတ်ကိုဖျောက်ကြပါလေ။
လဘော်ဂနီ၊မားစီးဒီးဘင့်ဇ်စီး၍၊သိန်းသောင်းချီတန်သောခြံဝန်းတိုက်တာတို့တွင် နေလင့်ကစားဘဝဟူသည်အတည်မကျလေသဖြင့် အိုရမည်နာရမည် ကားမချွတ်တည်း။တိုတောင်းလှသော “ဘင်”ဟူသည့်ကာလသည်သခါင်္ရသဘော၊ခဏတဖြုတ်မျှသာတည်လေသည်။ လက်ရှိတည်ဆဲဖွဲ့စည်းပုံဥဒေအရလွှတ်တော်နှင့်သမ္မတ၏သက်တမ်းငါးနှစ်ဟူသောအချိန်သည်၊သံသရာအရှည်နှင့်နှိုင်းစာလျှင်မျက်စိတမှိတ်လျှပ်တစ်ပြက်ခန့်ပင်မရှိလေ။
လက်မတစ်နှိပ်စာနိုင်ငံငယ်ကိုအစိုးရရုံမျှကာနှင့် ငါသမ္မတပဲ၊ ငါဝန်ကြီးပဲ၊ငါ့လက်ထဲမှာ အာဏာရှိတယ်ဟူသော၊ငါအစွဲအလန်းဖြင့်သာ သေသွားကြလျှင် နတ်၊ လူ၊ ငရဲ၊ ပြိတ္တာ၊ တိရစ္ဆာန် ဟူသော ဂတိငါးမျိုးတွင် ငရဲ၊ပြိတ္တာ၊တိရစ္ဆာန်ဟူသော အပါယ်ဂတိသို့ သာ ရောက် ပေလိမ့်မည်မချွတ်။ကိုယ်ပြုသောကံ၊ကိုယ့်ထံပြန်လာမည်ဖြစ်၍ကိုယ်စီးသောမြင်းအထီးအမ၊ခွဲခြားနိုင်စေလိုသည်။
လက်နက်မဲ့ပြည်သူတို့ကို အညှာတာကင်းမဲ့စွာပစ်ခတ်နှိမ်နှင်းခြင်း၊မိမိနှင့်အယူအဆမတူမျှသူတို့ကို ရာဇဝင်စာတင်လောက်သည့် နှစ်ရှည်ထောင်ဒဏ်များချမှတ်ခြင်း၊ဒီပဲယင်းအရပ်တွင်လျှို့ဝှက်စွာကောက်ကျစ်ယုတ်မာခဲ့ခြင်း၊ရဟန်သံဃာပါမချန်လောင်မီးဗုံးဖြင့်ခွင်း ခြင်းစသည့်မြောက်များလှစွာသော အကုသိုလ်ကံအကြောင်းတရားတို့၏အကျိုးဆက်သည် သေခါနီးလားရာဂတိထင်ချိန်တွင်၊အပါယ် ဂတိသို့တွင်တွင်ကြီးတွန်းပို့မည်မှာသေချာလှချေသည်။
နောက်ဘဝငရဲကျမီစပ်ကြား၊လက်ရှိမျက်မှောက်ဘဝမှာပင်၊ဇာတ်သိမ်းမလှခဲ့သော၊ရူမေးနီးယားသမ္မတနီကိုလေချောင်ရှက်ရှကူ၊အကြမ်းဖက်ခေါင်းဆောင်ဘင်လာဒင်၊လစ်ဗျားအာဏာရှင်ကဒါဖီ၊ အီရတ်သမ္မတ ဆက်ဒမ် ဟူစိန် တို့၏နောက်ဆုံးဖြစ်ရပ်ဆိုးသာဓကကို မမေ့ သင့်ကြလေကုန်။ညမှောင်မှောင်သမုဒ္ဒရာကြမ်းပြင်တွင်နိဋ္ဌိတံရသောဘဝဆိုးကို မကြောက်လေသလော။ ကြိုးစင်ကိုမမြင်လေ သလော။
လူထုကြားမှာပင်ခေါင်းတခြားကိုယ်တခြားဖြစ်ခဲ့သောအဖြစ်ကိုမကြောက်ရွံ့လေသလော။ ရွှေစင်အတိပြီးသောသေနတ်ငယ် ကိုကိုင် ကာ၊ရေမြောင်းထဲ တွင်ကြောက်လန့်တကြားရှောင်တိမ်း ပုန်းအောင်းရင်း၊ မမြင်ရက်၊မရှုရက်အဖြစ်ဆိုးဖြင့် အသက်ထွက်ရသည့်ကြက်သီး မွှေးညှင်းထဖွယ် ဘဝနိဂုံးကိုမမြင်မသိလေသလော။တရားမှန်ကိုတစ်လံမျှသောခန္ဓာကိုယ်တွင်ရှာချေလော့။
(သုံး)
အာဏာကိုဖက်တွယ်ထားခြင်းကားရှယ်ဖွယ်လိလိစိတ်ထားဖြစ်၍၊၊မဂ္ဂင်ရှစ်ပါးတည်းဟူသောအမြိုက်ဆေးကိုသုံးဆောင်ကြလျက်ဝိပဿ နာဥာဏ်ဝင်စားကာ(၂၀၁၅)ခုနှစ်တွင်တရားမျှတသောရွေးကောက်ပွဲကိုဖြစ်ပါစေကုန်လော့။ အမြင်၊ အကြား၊အနံ့၊အရသာ၊ အတွေ့အထိ ဟူသော၊အာရုံများသည် အာဏာလက်ကိုင်ရှိ သူတို့ကို သာယာဖွယ်ဖြစ်အောင် ဆွဲဆောင်တတ်ကြလေရာ၊ လက္ခဏာရေးသုံးပါး တင်၍ရှုနိုင်ကြလျှင်၊ ယင်းတို့ သည်ကာမမည်ပေ၏။
အာဏာကိုနိစ္စသဘောမြဲသည်ဟုထင်မြင်၍ ရွေးကောက်ပွဲကိုကလိမ်ကကျစ်နည်း သုံးရန်၊ အရူးအနှမ်းစိတ်မဝင်ကြ လေနှင့်။တိုင်းပြည်ချောက်ထဲကျမှာစိုးရိမ်တယ်ဟူသောဆင်ခြေသည်သစ္စာထိုက်မထိုက်၊ဆန်းစစ်ပါလေ။အာဏာ၏ဆွဲဆောင်မှုကြောင့် ယစ်မူးသာယာကာ၊ ရုန်းမထွက် ချင်အောင်နှောင်ဖွဲ့နေမှုသည်ကား ဂုဏဖြစ်ချေသည်။ ကာမနှင့်ဂုဏ ပေါင်းစပ်မိသော အခါကာမဂုဏ်မည်၏။
ထိုကာမဂုဏ်တရားတို့တွင် ဗိုလ်ချုပ်မှူးကြီးကတော်ပါ၏။ နောက်ဆုံးပေါ်မော်ဒယ်မြင့် မော်တော်ကားကြီးပါ၏။သားသမီးမြေးမြစ်တို့ပါဝင်၏။အဘ၊အဘကြီးဟူ၍မြှောက်ထိုးပင့်ကော်လုပ်နေသည့်ခြွေရံသင်းပင်း၊တပည့်လက် ရုံးတို့ပါဝင်၏။အခန်းခန်းအဆောင်ဆောင်တို့ဖြင့် နန်းတော်ကြီးတမျှခန်းနားသော တိုက်တာအဆောက်အဦး တို့ပါဝင်၏။ ယင်းတို့အား လုံးသည် ပြည်သူလူထု၏ အသက်သွေး ချွေးတို့ဖြင့် ထုဆစ်သွန်းလောင်းထားရသည်ကို ကောင်းစွာသိရာ၏။
မီးပေါက်သေနတ်စသောလက်နက်အားကိုးဖြင့်ဖန်တီးထားလေသော၊ထိုကာမဂုဏ်များအပေါ် လိုလားမှု တဏှာဆန္ဒကို ဖြတ်နိုင်မှသာ လျှင် ပဋိစ္စသမုပ္ပါဒ် သံသရာစက်ရဟတ်က ပြတ်နိုင်လိမ့်မည်ဖြစ်သည်။ ဖြစ်မှုပျက်မှု ဒုက္ခသစ္စာကို မမြင်ကြသဖြင့် တွယ်တာမှုသမုဒယ ဖြစ်လာကာဆက်တိုက်မိုက်မဲလျက်၊မြေပေါ်မြေအောက်သယံဇာတ၊သဘာဝဓာတ်ငွေ့စီမံကိန်း၊လက်ပံတောင်းတောင်မှကြေးနီစီမံကိန်းစသောတိုင်းပြည်ဘဏ္ဍာတို့ကို လစ်လျှင်လစ်သလို အရည်ဖျော်ကိုယ်ကျိုးရှာသည့်၊ကံသင်္ခါရများ ထပ်ခါထပ်ခါလုပ်ခဲ့သည့် အကြိမ်ပေါင်း မနည်းလှတော့ချေ။
ထိုအချောင်သမား၊သူခိုးသူဝှက်လုပ်ရပ်ကြောင့်ပင် မျက်မှောက်ကာလမှာပင် လူအများ၏မုန်းတီးရွံ့ရှာစက်ဆုတ်ခြင်းတည်းဟူသော ဒုက္ခ သစ္စာကို ထပ်၍ရလာပြန်သည်ကို လူ့ဗာလတို့သည်ဥာဏ်တွင်မထင်ကြလေသလော။
စစ်ဗိုလ်ချုပ်အချင်းချင်းစားမာန်ခုတ်ရာမှရာထူးကြီးကြီးမှပြုတ်၍အရပ်သားဘဝရောက်ခဲ့ကြလေသော ဗိုလ်ချုပ်ကြီးဗိုလ်ချုပ်ကလေး တို့ကား ခွေးလေ ခွေးလွင့်မျှလောက်ပင် လူတိုးမနိုင်ရှာကြပဲ၊မျက်နှာငယ်ဖြင့်ကိုယ်ပျောက်အတတ်ကို ကျင့်ကာ၊နတ်စည်းစိမ်တမျှကြွယ်ဝ လှသည့်ဥစ္စာဓန တို့ကိုပိုက်ရင်း အရှင်လတ်လတ်ငရဲကျနေသည့်အဖြစ်တို့ကို သံဝေဂတရားဖြင့်သင်္ခန်းစာယူထိုက်လှပေသည်။
(လေး)
စစ်ဝါဒီတို့၏ရှေးဘဝအဆက်ဆက် အကုသိုလ်အဟုန်ကားကြီးလှချေ၏။တော်ရုံအကုသိုလ် ဆက်မပါပဲတတိုင်းပြည်လုံး ပြုတ်ပြုတ်ပြုန်း အောင်ရာစုနှစ်တဝက်ကျော်မဖျက်ဆီးနိုင်တန်ရာ။ထိုအကုသိုလ် အရှိန်အဟုန်ဆက်လက်တောက်လောက်ကာ၊ မဟာကပ်ကမ္ဘာမှသည် သုညကမ္ဘာသို့ချဉ်းသည့်တိုင်မလွတ်နိုင်သည့်မဟာအဝီစိငရဲတွင်ခံစားမည့်အရေးကို တွေးလျက်ကိုယ့်ကိုယ်ကိုသနားကြစေချင်ပါ၏။
လုပ်ပိုင်ခွင့်၊ အာဏာရှိ စဉ်ခဏတွင်၊မြေသိမ်းယာသိမ်း၊ သူတစ်ပါးအသိုက်အမြုံတို့ ကိုဘူဒိုဇာဖြင့်ထိုးလျက်၊မဲမဲမြင်ရာ ထင်တိုင်းကြဲခြင်းဖြင့် နှစ်လနေ့ရက် နာရီတို့ကို အလဟဿ အချည်းအနှီးမကုန်ဆုံးပါစေနှင့်။မြန်မာ့သမိုင်းအစောင်စောင်တွင်၊ လူထုကိုနှိပ်စက်ကလူပြုခဲ့ သောမကောင်းမှုဒုစရိုက်တို့ကား ကမ္ဘာကြေသော်လည်းဥဒါန်းမကြေနိုင်၊မရေတွက်နိုင်အောင် များလှချေပြီ။
“ငါးဆူရှင် ပါရမီတော်ရင့်သည်။ ပွင့်တော်မူရာ ဘဒ္ဒဤကမ္ဘာ၊ ဗုဒ္ဓုပ္ပါ ငါးကြိမ်ဆင့်တောင် ကျွတ်ခွင့်မပါ လွဲလျက်မှန်စွာ၊ ရှည်လျား- သုညကမ္ဘာတွေမှာ- ဓမ္မာသွေခွါ အပါယေမှာ ပျော်ဖို့ ၊ တရားမသိလို့ အမြဲမိစ္ဆာ၊ အမှားအတိ အလွဲစိတ်မှာ၊ ငရဲတိရစ္ဆာ တကတဲမဆိတ်စွာ အသဲထိတ်စရာ စည်ပင်ကြတော့မှာ”ဟူသော တရားဓမ္မတေးသံကိုကြားယောင်ကြပါလော့။
ကြယ်လေးပွင့်တပ်ဗိုလ်ချုပ်မှူးကြီးဝတ်စုံ၊မောင့်ကြက်သရေခေါင်းပေါင်းတို့နှင့်၊အပုပ်ကောင်ကိုတင့်တယ်အောင်စီမံထားကြသော်ငြား စင်စစ်ပထဝီ၊တေဇော၊အာပေါ၊ဝါရောဟူသည့် မြေရေလေမီးဓာတ်ကြီးအစုပင်ဖြစ်၍ ဘယ်လိုကြည့်ကြည့်မမြတ်သော၊စက်ဆုတ်ရွံ့ရှာ ဖွယ်အတိပြီးသော ခန္ဓာကိုယ် အတ္တဘောကြီးသာဖြစ်ချေ၏။သလိပ်၊သည်းခြေ၊အရိုးအရည်အစရှိသည့်၊၊မုန်းစရာကောင်းလှသော သုံး ဆယ့်နှစ်ကောဠာသအစုအပုံကို ရှုဖွယ်တင့်မောဖွယ်ပါတကား ဟုမြင်နေကြခြင်းကား အဝိဇ္ဇာဖုံးနေသောကြောင့်ပင်တည်း။မလှန်သာ၊ မတတ်သာသဖြင့်ငြိမ်ခံနေကြရသောလူထုသည် အသင်တို့အားလေးစားမြတ်နိုးနေ သည်ဟုရံခါမျှပင်မတွေးစကောင်း။
အသင်တို့၏ ကြီးမြတ်လှသောခေါင်းဆောင်ကြီး၏အမည်မဖော်ပြရဲသောမိသားစုဝင်တစ်ဦးပင်နာခြင်းတည်းဟူသောဒုက္ခကြောင့် စင်္ကာပူ ဆေးရုံမှ ဆင်းလာခဲ့သည်ပင်မကြာသေး။ အသင်လည်းဤသို့နာရရုံသာမက လမ်းဆုံးတွင်မရဏတည်းဟူသောသေခြင်းတရားနှင့် မုချဆတ်ဆတ် ကြုံရချေဦးမည်။ဗိုလ်ချုပ်မှူးကြီးလည်းသေမျိုးဖြစ်၏။ သမ္မတဟူ၍၊ ဝန်ကြီးလွှတ်တော်အမတ်ဟူ၍သေဘေးမှလွတ်ငြိမ်း ချမ်းသာခွင့်ရသူဟူသည်မရှိ။
အတီတာ မိုက်စ မိုက်ပင်ပျိုး၍မိုက်ဆိုးခဲ့သည်မှာ(၁၉၆၂)ခုနှစ် ကတည်းကဖြစ်ချေ၏။ (၁၉၈၈)ခုနှစ်တွင်ထပ်၍မိုက်၏။(၂၀၁၀)ခုနှစ်တွင် ဝတ်စုံပြောင်းကာဆက်၍လှည့်ဖျား၏။ (၂၀၁၅)တွင်လည်း၊တရားလက်လွတ်ယုတ်မာကောက်ကျစ်သည့်အကျင့်စရိုက်တို့ဖြင့် မိုက်မြဲမိုက် လျက်၊လူထုအော့နှလုံးနာအောင်အမိုက်ခရီး ဆက်လျက်ရှိနေကြချေသေးသည်။ ယခုလည်းမိုက်မြဲမှန်စွာ၊ရှေ့ကိုတိုးလို့တံပိုးမိုက်နေကြသည် လုပ်ရပ်တို့ကား မတုန့်မဆိုင်းမြန်မြန်ကြီးအဆုံးသတ်သင့်ကြလေပြီ။
(ငါး)
တရားကွာ၍ မှားရှာကြသည့်အစိုးရမင်းတို့သည်၊ လူနတ်ဗြဟ္မာသတ္တ၀ါတို့၏မတည်မြဲသော ဘ၀အနေကာ ဖြစ်ပျက်သံသရာကိုမသိကြ လေယောင်တကား။မုသားကိုရေလိုသုံးနေသူများအတွက်မလုပ်ရဲတာမရှိလေသည့်အစိုးရမင်းတို့၏ကာမဂုဏ်ရမ္မက်ဆိုးကို အဘယ်ကာ လတွင်မှရိုက်ချိုးနိုင်ကြပါမည်နည်း။ပညာပါရမီနည်းပါးလှချေ၏။မုန်တိုင်းဒဏ်ကြောင့်အလောင်းပင်မကောက်နိုင်သောကာလတွင် (၂၀၀၈)ဖွဲ့စည်းပုံကိုအတည်ပြုခဲ့၏။
ထို့ထက်ဆိုးသည်ကား၊ထိုစဉ်ကမဲနိုင်ရခဲ့သည့်ရာခိုင်နှုန်းဖော်ပြချက်မှာယခုကောက်ယူပြီးစီသည့်သန်းခေါင် စာရင်းအရ လိမ်ညာလှည့်ခြင်းဖြစ်ကြောင်း ထင်ရှားနေချေသည်။ခြောက်နှစ် အတွင်းလူခြောက်သောင်းသေဆုံးကုန်ရန်မဖြစ်နိုင်၍ မဲခိုးထားကြောင်းပေါ်လွင်နေ၏။ အရှက်တရားနှင့်လူလုပ်ကြပါမူအသက်နှင့်လဲသင့်ကြလှချေသည်။
ရန်ကုန်တိုင်းဝန်ကြီးချုပ်ကဲ့သို့ပုဂ္ဂိုလ်ကလည်း၊ဒီမိုကရေစီစနစ်ကိုပင် မေ့လျော့ကာ၊ကိုယ်ပိုင်မြို့သစ်ကြီးတစ်ခုကိုစိတ်ကူးဖဲရိုက်နေခဲ့ သည်မှာ၊ အနုသယကိလေသာကို ယတိပြတ်ခြွေပယ်ဖို့ဝေးစွ။သမာဝါယမ၊မဖြစ်မူ၍၊လုံးလုံးလျားလျား သမာဓိကင်းမဲ့လေသဖြင့် ဝိပဿ နာဥာဏ်စိုးစဉ်းမျှမရှိကြောင်းထင်ရှားရာသည်။
သည်လိုပုံနှင့်မိုးကြီးချုပ်လျှင်ဖြင့်၊မီးဆယ့်တစ်မီး ငြိမ်းရာချူပ်ရာအမြိုက်နိဗ္ဗာန်ရွှေဘုံထီးနှင့်အပုံကြီးကွာဆဲသာဖြစ်ချိမ့်မည်။လောဘရမက် အလျှံတညီးညီးတောက်လောင်ဆဲဖြစ်၍ဒိဋ္ဌိနှင့်ဝိစိကိစ္တာကို သမုစ္ဆေပဟာန်ဧကန်ပယ်ခွာနိုင်ရန်လမ်းစမျှမမြင်သေးချေ။မဂ်တရားဖိုလ်တ ရားနှင့်ဝေးလှပါဘိတောင်း။နတ်ရွာနိဗ္ဗာန်လမ်းကို လှမ်းဖို့ အမှုမှာ စိတ်ထဲတွင်ပင်ပေါ်ဟန်မတူသေးချေ။သို့ဆိုပါမူပြည်သူလူထု၏စိမ်ရေ သင့်သောဘဝနှင့်ပင် ကိုယ်တွင်းကိုယ်ပဘေးရန်တကာဖြင့် အစတုံးကာဘဝဆုံးရရှာပေတော့မည်။ မကောင်းမှုဒုစရိုက်တို့နည်းပါးအောင် ယခုကပင်ကျင့်ကြံပါလေတော့။
ကိုယ်ချမ်းသာလျှင်ပြီးရော၊တိုင်းပြည်အား၊အပေါင်ဆုံးပစ္စည်းအဖြစ်ပေါက်ဖော်မသူတော်ပေမှေးတို့လက်သို့ ထိုးအပ်မည့် ယုတ်မာလှသည့် အကြံအစည်ကိုရပ်တန်းကရပ်ပါကြကုန်လော့။
(ကျမ်းဆုံးနိဂုံး)
နိဂုံးချုပ်အနေဖြင့်မှာကြားလိုသည်ကားအစိုးရမင်းတို့မည်သည်၊မျိုးနွယ်သီလပြည့်စုံသည်လည်းတပါး၊အဂတိလေးပါးမလိုက်မှန်ကန်သည်လည်းတပါး၊ကောက်ယူဆွဲငင်ဆုံးဖြတ်ခြင်း၌ပညာရှိသည်လည်းတပါး၊ချစ်ဖွယ်သောစကားကိုဆိုတတ်သည်လည်းတပါး၊ဓမ္မသတ်ရာဇ သတ်ဖြတ်ထုံးတို့၌လိမ္မာခြင်းသည်လည်းတစ်ပါး၊ငါးပါးသောရာဇဂုဏ်ဖြင့်ပြည့်စုံရကြောင်းရာဇနီတိတွင်ပြဆိုသည်။
သို့ဖြစ်၍တဖြုန်းဖြုန်းမောက်မို၍တဟုန်းဟုန်းတောက်လောင်နေသောလောဘ ဒေါသ မောဟ၊ကိလေသာလောင်မီးတို့ငြိမ်း စေချင်လှ သည်။အာဏာကိုအလွဲသုံးကာ၊ပြုလွယ်ဖြစ်လွယ်သော အကုသိုလ်စရိုက်ဆိုးတို့ကိုမဆင်ခြင်နိုင်သမျှ၊လားရာဂတိသည်အပါယ်သို့သာ ဦးတည်နေပေလိမ့်မည်။သမ္မတ၊ဝန်ကြီး၊လွှတ်တော်အမတ်တို့၏ပျှမ်းမျှအသက်မှာ သေပေါက်သေဝသို့ ခြေတစ်ဖက် လှမ်းနေကြပြီ ဖြစ်၍မိမိ တို့မူလလာရာအရပ် အပါယ်လေးဘုံကို ပြန်လည်အောက်မေ့တသမနေကြလေနှင့်။
ဤမေတ္တာစာ သည်စနစ်တကျမှားယွင်း နေကြ သူအားလုံးသို့၊ တဲ့တိုးတိုက်ရိုက်ရည်ညွန်း၏။ ခရိုနီတို့လည်းပါဝင်၏။ စစ်ဝါဒီလော်ဘီတို့နှင့် လည်းသက် ဆိုင်၏။ အချိန်မိအသိ ရကြပါစေသတည်း။စကြာဝဠာတိုက်တစ်သောင်းမှ၊လူနတ်ဗြဟ္မာအပေါင်းသည်၊စစ်ဝါဒီတို့၏ ဖိနှိပ်ညှင်းဆဲခံ ရခြင်းဒုက္ခ ဘေးမှကင်း ဝေးကြပါစေကုန်သတည်း။
ခေတ်သစ်ရာဇနီတိဆုံးမစာဤတွင်ပြီး၏။
-ဝေါဟာရရှင်းလင်းချက်
တေဘုမ္မာ = အပါယ်လေးဘုံ လူ့ဘုံနှင့် နတ်ပြည်ခြောက်ထပ်ပါဝင်သည့် ကာမဘုံ၊ ရူပဘုံ၊ အရူပဘုံဟု ခေါ်သော ဘုံသုံးပါး။
ပဋိစ္စသမုပ္ပန် = ပဋိစ္စသမုပ္ပါဒ = အဖန်ဖန်ဖြစ်ခြင်း။ ဘ၀ခန္ဓာများ အကြိမ်ကြိမ် အဖန်ဖန် ဖြစ်ခြင်း။
အ,သာရကာ= ဘာအနှစ်သာရမျှမရှိ
- ကိုးကား။ ။
(၁) ဆရာကြီးဒဂုန်ဦးထွန်းမြင့်၏ ပါဠိသက်ဝေါဟာရ အဘိဓာန်
(၂) လယ်တီဆရာတော်ဘုရားကြီး၏ ပဋိစ္စသမုပ္ပါဒ်ဒီပနီ
(၃) ဆန်းစုနိုင်၏တေဘုမ္မာသီချင်းရှင်းလင်းချက်