အခန်း(၆)
ထလန်ခံတပ်ရှာပုံတော်
၂၀၁၃ခုနှစ်။ ထိုင်းနိုင်ငံဖူးခက်မြို့။
ကိုသက်ခိုင်။ ။`(ထ)ရူးဝါးဆိပ်ကမ်းဆိုတာ မစ္စတာ`ဥ´ သိသလားဗျ´
ဥ။ ။`(ထ)ရူးဝါးဆိုတာ အနုစာဝါရီအနားတ၀ိုက်နယ်မြေကို ခေါ်တာလေ´
ကိုသက်ခိုင်။ ။`ကျနော်ဆိုလိုတာက ထလန်ခံတပ်ကို ဗမာတွေသိမ်းနိုင်ဖို့ ဗမာတိုက်လှေတွေ ကမ်းကပ်ခဲ့တဲ့ (ထ)ရူးဝါး ဆိပ်ကမ်းကိုပြောတာ၊ ယိုးဒယားမြန်မာစစ်သမိုင်း မှတ်တမ်းတွေအရ ဖူးခက်မြို့ကို ဗမာဘုရင့်တပ်တွေ ရောက်လာတိုင်း (ထ)ရူးဝါးဆိပ်ကမ်းမှာ ကမ်းကပ်တယ်လို့ဆိုတယ်ဗျ၊ယိုးဒယားတပ်တွေဟာ မလေးရှားနဲ့ မဟာမိတ်ဖွဲ့ပြီး ဗမာတပ်တွေကို ခံတိုက်တဲ့ ရာမူးအငူ တိုက်ပွဲဆိုတာ အင်မတန်ကြီးကျယ်တဲ့ တိုက်ပွဲကြီးပဲလေ´
ဥ။ ။`ကျနော်တို့ယိုးဒယားတွေက မလေးရှားနဲ့ အဆင်မပြေတာများတယ်ဗျ။ ယိုးဒယား၊မလေးရှား မဟာမိတ်ဖွဲ့ပြီး ဗမာတွေကို တိုက်ခဲ့တယ်လို့ ဗမာ့သမိုင်းမှာ ရေးထားလေရော့သလား´
ကိုသက်ခိုင်။ ။`ဗမာစစ်သမိုင်းမှာ ဖူးခက်တိုက်ပွဲအကြောင်းကို ဖော်ပြထားတာ မရှိသလောက်ပါပဲ၊အခု ကျနော် ရည်ညွန်း နေတဲ့စာအုပ်က စကော့တလန်လူမျိုးတစ်ယောက်ရေးထားတာပါ´
ဥ။ ။ `အဲဒီသမိုင်းစာအုပ်ဟာ ကျိုးကြောင်းဆီလျော်တယ်လို့ ဆိုနိုင်သလား မစ္စတာသက်´
ကိုသက်ခိုင်။ ။ ဒီစာအုပ်ထဲမှာ ဖော်ပြထားတဲ့အချက်အားလုံးဟာ မှန်တယ်လို့ မဆိုသာပေမဲ့ ထလန်ခံတပ်တိုက်ပွဲမှာ မလေးရှားနဲ့ယိုးဒယားမဟာမိတ်ဖွဲ့ပြီး ဗမာတပ်တွေကုို တိုက်ခဲ့တယ်ဆိုတာမျိုး၊ ထင်ရှားမြင်သာတဲ့အချက်ကတော့ မလွဲ လောက်ဘူး။သမိုင်းမှတ်တမ်း ရှေ့နောက်အစဉ်အဆက်တွေနဲ့လည်း ကိုက်ညီနေတယ်ဗျ´
ဖူးခက်မြို့မဆီမှ ဖူးခက်လေဆိပ်သို့သွားရာ လမ်းမကြီးပေါ်တွင် တရိပ်ရိပ်ပြေးနေသော တိုယိုတာဗီဂိုး ကားပေါ်၌ ကိုသက်ခိုင်နှင့် မစ္စတာ`ဥ´ စကားအချီအချ၊အမေးအဖြေလုပ်နေကြခြင်းဖြစ်လေသည်။မြန်မာလိုပြောဆိုနေကြခြင်းတော့မဟုတ်။ အင်္ဂလိပ်၊ထိုင်းဘာသာ တို့ဖြင့် သူတို့ပြောဆိုချက်များကို သိသာရန် ကျနော်က မြန်မာမှုပြုထားခြင်းဖြစ်၏။
ကိုသက်ခိုင်တစ်ယောက် မည်သည့် စိတ်ကူးပေါက်လေသည် မသိ။ ဗြုန်းစားကြီး အနုစာဝါရီဘက် ခေတ္တသွားမည်ဆိုကာ ကျနော့်ကို အဖော်စပ်သဖြင့် ထုံးစံ အတိုင်းဘုမသိ ဘမသိ၊ ဒရွတ်တိုက် လိုက်ပါခဲ့ရခြင်းပင်။သည်တစ်ကြိမ်တော့ ကိုသက်ခိုင်၏ ယိုးဒယားလူမျိုးမိတ်ဆွေဖြစ်သူ မစ္စတာ`ဥ´၊ကျနော်တို့နှင့် အတူပါလာသည်။
`ဥ´ ၏အမည်ရင်းမှာ `ချင်နာပက် အင်သရာနွန်´ဖြစ်သည်။ `ဥ´၏ ဇနီး`ယင်း´မှာ ဖူးခက်တိုယိုတာကား အရောင်းပြခန်းမှ အအောင်မြင်ဆုံး အရောင်းကိုယ်စားလှယ်တဦးဖြစ်ပြီး သူတို့တမိသားစုလုံးနှင့် ကိုသက်ခိုင် အလွန် ခင်မင်ရင်းနှီးသည်ဆို၏။ ဥသည် သြစတေလျနိုင်ငံတွင်အနုပညာဆိုင်ရာ ဒီပလိုမာရခဲ့သူဖြစ်ပြီး ဥမိခင်မှာ ပါလီမန် အမတ်ဖြစ်သဖြင့် ဖူးခက်မြို့တွင် လူဂုဏ်တန်အသိုင်းအ၀ိုင်းဟု ဆိုနိုင်သည်။မည်သို့သော အကြောင်းကြောင့်ဟု ကျနော် မခန့်မှန်းနိုင်သော်လည်း `ဥ´ သည် ကိုသက်ခိုင်အား အထင်ကြီးလေးစားနေသည့် အမူအရာမှာမူ အလွန်ထင်ရှား၏။
အနုစာဝါရီအ၀ိုင်းအနီးရှိ ဖူးခက်သမိုင်းပြတိုက်ဆီသို့ ကားကွေ့ဝင်လိုက်ရင်း `ကိုမင်းဒင်၊ဟိုစာအုပ်ကြီးကို အဆင်သင့်ယူခဲ့ စမ်းပါဗျာ´ဟူသော ကိုသက်ခိုင်၏ လမ်းညွန်ချက်ကြောင့် ကိုသက်ခိုင်၏ ရည်ရွယ်ချက်ကို ကျနော် အနည်းငယ် ရိပ်စားမိလာသည်။ ပြတိုက်ဝင်ကြေးမှာ တစ်ယောက်လျှင်ဘတ်တစ်ရာနှုန်းဖြစ်သော်ငြား ခင်းကျင်းပြသထားသော ပစ္စည်းများမှာ အားရစရာမရှိလှချေ။ကိုသက်ခိုင်ကား ပြတိုက်တွင်းမှ ရှိသမျှအထောက်အထားများကို စေ့စေ့စပ်စပ် လေ့လာနေ၏။အင်္ဂလိပ်၊ထိုင်းဘာသာတို့ဖြင့် ရေးသားထားသော မှတ်တမ်းဟောင်းတို့ကို စိတ်ဝင်တစားဖတ်ရှုနေ၏။
ယိုးဒယားပြည်ကြီးကား စီးပွားရေးအရ စည်ပင်ဝပြောနေသော်ငြား သမိုင်းမှတ်တမ်းတို့ကို တန်ဖိုးထားရကောင်းမှန်း သိသည့် လူမျိုးမဟုတ်ကြောင်း ဤပြတိုက်က သက်သေခံလျက်ရှိသည်။ပြတိုက်တွင်း ၀င်ကြည့်သူ ထိုင်းလူမျိုးမရှိ သလောက်ပင်။ထို့အတူ နိုင်ငံတကာဧည့်သည်တို့ စိတ်ဝင်တစားဖြစ်အောင် ရှာဖွေစုဆောင်း ပြသနိုင်ခြင်းလည်းမရှိချေ။ အကယ်၍သာ ပြည့်စုံသောဖူးခက်သမိုင်းကို ဖော်ပြထားမည်ဆိုပါလျှင် ကျနော်တို့၊ ဘေးလောင်းတော်၊ဘိုးလောင်းတော် မြန်မာဘုရင်များ၏ တန်ခိုးရှိန်စော်အာနုဘော်စက်ဝန်းသည်လည်း ဒွန်တွဲပါဝင်တည်ရှိနေပေလိမ့်မည်။ဤအချက်ကြောင့်ပင် ဖူးခက်သမိုင်းကို ယိုးဒယား လူမျိုးတို့ မတူးဆွကြလေသလော။
ကျနော်က စကော့လူမျိုးသမိုင်းဆရာ၏ စာအုပ်ထူကြီးကိုကိုင်ရင်း အတွေးမျိုးစုံပွားနေချိန်တွင် ကိုသက်ခိုင်ကား `ဥ´နှင့် စကားလက်ဆုံကျလျက်ရှိသည်။စကားလက်ဆုံဟုဆိုခြင်းထက် ကိုသက်ခိုင်၏ နှိုက်နှိုက်ချွတ်ချွတ်မေးခွန်းများကို `ဥ´တစ် ယောက် ချွေးထွက်အောင်ပြန်ဖြေနေရသည်ဆိုလျှင် ပို၍မှန်ပါမည်။ပြတိုက်မှအထွက် (ထ)ရူးဝါးဆိပ်ကမ်းဆီသို့ သွားရာ လမ်းတလျှောက်တွင်လည်းကောင်း၊(ထ)ရူးဝါးဆိပ်ကမ်းမှ တုန်ဆိုင်းတောင်သို့သွားရာလမ်းတလျှောက်တွင်လည်း ကောင်း ကိုသက်ခိုင်တစ်ယောက် စက်သေနတ်ပစ်သလို မေးခွန်းများတလစပ်မေးနေပြန်သည်။
`(ထ)ရူးဝါးဆိပ်ကမ်းနဲ့ တုန်ဆိုင်းတောင် ဘယ်လောက်ဝေးတုန်း `ဥ´´
`အတိအကျတော့ မပြောတတ်ဘူး။ဘာကြောင့်သိချင်တာပါလိမ့်´
`ဒီလိုဗျ။ ဗမာတပ်တွေရဲ့ တိုက်လှေတွေဟာ (ထ)ရူးဝါးဆိပ်ကမ်းမှာကပ်တယ်။ နောက်`တုန်ဆိုင်းရေတံခွန်´ရှိတဲ့ တုန်ဆိုင်းတောင်ပေါ်ကို အမြှောက်တွေ ဆွဲတင်တယ်။ တုန်ဆိုင်းတောင်ပေါ်ကနေ ထလန်ခံတပ်ဆီကို အမြှောက်တွေနဲ့ လှမ်းပစ်တယ်။တချို့တပ်တွေက ၀ါးညှောင့်တွေလှည်းလိုဆင်ပြီး ခံတပ်ကို ချည်းကပ်တယ်။ ဒါနဲ့ ထလန်ခံတပ်နေရာ အတိ အကျကို ခင်ဗျားသိသလား´
`နှစ်တိုင်းအောင်ပွဲကျင်းပနေတဲ့ ထလန်မီးပွိုင့်အလွန် ညာဖက်ကွေ့နားက ကွက်လပ်ကြီးကတော့ ထလန်ခံတပ်လို့ ပြောကြ တာပဲ´
`မဟုတ်သေးဘူးဗျ။ ထလန်ခံတပ်ထဲကို တုန်ဆိုင်းတောင်ပေါ်ကနေ အမြှောက်နဲ့လှမ်းထုနိုင်တယ်ဆိုတော့ လွန်ခဲ့တဲ့ အနှစ် နှစ်ရာက ဗမာစစ်တပ်အသုံးပြုခဲ့တဲ့ အမြှောက်တွေဟာ ခန့်မှန်းခြေလေးငါးမိုင်အကွာအဝေးကို ပစ်နိုင်သလားဆိုတာ ထည့်စဉ်းစား သင့်တယ်။နောက် ကျနော်စိတ်အ၀င်စားဆုံးအချက်က ထလန်ခံတပ်ဟာ ဗမာစစ်တပ်တွေ အကြိမ်ကြိမ် စီးနင်း တိုက်ခိုက်ခဲ့ပါလျက်နဲ့ အလွယ်တကူမကျခဲ့ဘူး။ ဒီခံတပ်ကို ဘယ်သူတွေ ဘယ်လိုနည်းပညာတွေနဲ့ တည်ဆောက်ခဲ့သလဲ။ အဲဒီခေတ်က ဖူးခက်ဝန်းကျင်ကို ပေါ်တူဂီ၊ဒတ်ခ်ျ၊အင်္ဂလိပ်တွေ အကုန်ရောက်နေပြီမို့ သူတို့ဆီက ခံတပ်တည်ဆောက် နည်း ပညာတွေကို ယိုးဒယားတွေ ရခဲ့သလား´
`ကျနော်လည်း ဖူးခက်ချက်မြှုပ်ပဲဗျ။ ခွန်သက်ခိုင်ပြောတဲ့ အကြောင်းတွေကျနော်တခါမှ မကြားဖူးတာအမှန်ပဲ´
`ဖူးခက်ပင်လယ်ပြင်ထဲမှာ ယိုးဒယားမဟာမိတ်တပ်တွေနဲ့ ဗမာစစ်တပ်တွေဟာ တိုက်လှေတွေထောင်ချီအသုံးပြုပြီး ကြီးမားပြင်းထန်တဲ့ ရေကြောင်းတိုက်ပွဲကြီးတွေဆင်နွှဲခဲ့ကြတယ်။ အဲဒီခေတ်က ယိုးဒယားတိုက်လှေတွေကို ဘယ်မှာ တွေ့နိုင်တုန်းဗျ´
`ကျနော်က သမိုင်းသုတေသီမှ မဟုတ်တာ ဘယ်လိုသိမှာတုန်း´
`ဒီအချက်လောက်ကို သိဖို့ သမိုင်းပညာရှင်ဖြစ်မှ မဟုတ်ပါဘူးဗျာ´
`နေဦးဗျ။ ခွန်သက်ခိုင်ရ။ ကျနော့်ဘိုးဘွားတွေ ပြောစကားအရ အခုခေတ် နိုင်ငံခြားသားတွေနဲ့စည်ကားနေတဲ့ ပါတောင်၊ ကရွန်း၊ကတ၊ကမလာကမ်းခြေတွေဟာ ဟိုးလွန်ခဲ့တဲ့နှစ်ပေါင်းများစွာတုန်းက တောကြီးမျက်မည်းတွေလို့ဆိုတယ်။ ဖူးခက်မြို့ဝန် ရုံးစိုက်တာက ထလန်မြို့ဟောင်းတဲ့။ထလန်မြို့ကို တည်ထောင်တုန်းက မြို့ကို ကာကွယ်နိုင်အောင် လူတွေ ကိုသတ်ပြီး အိုးကြီးတွေထဲမှာထည့်၊မြို့လေးထောင့်မှာ အဲဒီအိုးတွေ မြှပ်ထားသတဲ့။ ရှေးအယူအဆဆိုပါတော့´
စကားတပြောပြောနှင့်ပင် တုန်ဆိုင်းရေတံခွန်မှအပြန် ထလန်ခံတပ်ဟောင်းဟု ယိုးဒယားအများစု လက်ခံထားသည့် မြေကွက်လပ်ကြီးဆီသို့လည်း ကျနော်တို့ရောက်ရှိခဲ့ပြန်သည်။ခံတပ်ဟောင်းဟုဆိုကြသည့် ကျယ်ဝန်းသော မြေကွက် လပ်ကြီးမှနေ၍ စိမ်းညို့နေသော တောင်တန်းကြီးများကို အဝေးမှာလှမ်းမြင်နေရသည်။ ခံတပ်ဟောင်း ဟုတ်မဟုတ် စူးစမ်းနိုင်ရန် အထောက်အထားဟူ၍ အဆောက်အဦးဟောင်း၊အုတ်ရိုးအုတ်ခုံဟောင်း ဘာဆိုဘာမျှမရှိ။ ရေကြည်သော ချောင်းငယ်တစ်ခုကို ဖြတ်ကျော်ဆောက်လုပ်ထားသည့် ခနော်ခနဲ့ သစ်သားတံတားငယ် တစ်စင်းနှင့် ထန်းပင်ခပ်အုပ်အုပ် တို့မှလွဲ၍ နတ္ထိ။
ကိုသက်ခိုင်ကား တောင်တန်းများကို နောက်ခံပြုနေသည့် ထန်းတောအုပ်ကို ဓာတ်ပုံတဖျတ်ဖျတ်ရိုက်နေသည်။ ထလန်ခံ တပ်ဟောင်းကွင်းပြင်အနီးတွင်တည်ရှိသော ဖူးခက်သူရဲကောင်း အနုစာဝါရီညီအမ၏ နတ်ကွန်းကို စပ်စုနေသည်။ ထိုနတ်ကွန်းတွင် အနုစာဝါရီညီအမ၏ ရုပ်တုငယ်ကလေးများကို တွေ့ရလေရာ ၊ထိုရုပ်တုတို့ကို ၀တ်စားဆင်ယင်ထားပုံမှာ မလေးရှားမွတ်ဆလင်အမျိုးသမီးများ၏ ပုံစံအတိုင်းဖြစ်သည်ကို သတိပြုမိသည်။ ထိုနေ့က ကိုသက်ခိုင်တစ်ယောက် ညနေ မှောင်ရီပျိုးချိန်အထိ ထလန်နယ်မြေအနီးတ၀ိုက်တွင် အလုပ်ရှုပ်နေခဲ့ခြင်းမှာ ထလန်ခံတပ်ဟောင်းရှာပုံတော်ခရီးပေ တကား။တစ်နေ့တစ်ရက်၊တဦးတဖွဲ့မျှပင် စူးစမ်းနိုင်လောက်သော ခြင်းရာမဟုတ်လေရာ၊ ကိုသက်ခိုင်ကား နိုင်ငံတကာ သမိုင်းပညာရှင်များနှင့် ချိတ်ဆက်စူးစမ်းဦးမည်ဟု ကြုံးဝါးနေပြန်ချေသည်။
မစ္စတာဥတစ်ယောက် ထလန်၊လိုတပ်(Lotus)ကုန်တိုက်မှာ ကျန်ရစ်ခဲ့သည်ဖြစ်၍ အပြန်လမ်းတွင် ကျနော်နှင့်ကိုသက်ခိုင် ကားပေါ်မှာ စကားဆက်ဖြစ်ကြသည်။
`ဒါနဲ့ခင်ဗျားညီလင်းဆက်ကိုပြောတဲ့ထလန်တိုက်ပွဲမှာ ထလန်ခံတပ်ထဲက ဖူးခက်သားတွေကြောက်ဒူးတုန်နေတာနဲ့ အဆုံး သတ်ထားတော့ မြန်မာတွေက ခံတပ်ကိုသိမ်းနိုင်ရောလားဗျာ´
`မသိမ်းနိုင်သေးဘူးဗျ၊ စာရေးသူဟာ ယိုးဒယားတွေရဲ့ခံစစ်ကိုလည်း ရေးပြထားသေးတယ်´
`ဒါဆိုလည်း ခံတပ်သိမ်းတိုက်ပွဲအကြောင်းဆက်ပါအုံးဗျ၊ ခင်ဗျားဥစ္စာ ဆန့်တငံ့ငံ့နဲ့´
![]()
ကျနော့်တိုက်တွန်းမှုကြောင့် ကိုသက်ခိုင် ဆက်ပြောလေသော မြန်မာတို့၏ ဖူးခက်ခံတပ်သိမ်းတိုက်ပွဲမှာ အောက်ပါအတိုင်း ဖြစ်လေ၏။
`အဲဒီစာအုပ်မှာ ဖော်ပြထားတာကတော့ ယိုးဒယားတွေဟာ မြန်မာတွေရဲ့ အရှေ့တောင်ပံတိုက်စစ်ကို အောင်မြင်စွာ ခုခံ နိုင်ခဲ့သတဲ့။အဲဒီလိုခုခံကာကွယ်နိုင်ခဲ့သူဟာ ဒုတိယရာမဘုရင်ကိုယ်တိုင်လို့ဆိုတယ်။သူဟာ ဖူးခက်ကာကွယ်ရေးအတွက် ဖရာ့ထိုင်းနန်ကို စစ်သူကြီးခန့်ပြီး၊နခွန်စီထမရတ်နဲ့ ဆွန်ကလာမြို့ဝန်တွေကို စစ်ကူလွှတ်စေတယ်။စစ်ဦးစီးချုပ် ဖရာ့ သောင် ဆာရိုသာရဲ့ရေတပ်ကိုလည်း ချိုင်းရာကိုလွှတ်ပြီး ထလန်ခံတပ်မကျစေဖို့ အားဖြည့်တယ်။မြောက်ပိုင်းမှာ မြန်မာတပ်တွေကို အောင်နိုင်ပြီးတစ်လအကြာမှာ စစ်သူကြီးဖရာ့ဘူရင်သရာ ဦးဆောင်တဲ့ ယိုးဒယားတပ်မကြီးဟာ တောင်ပိုင်းကို ချီတက်နိုင်ခဲ့ပြီး ကြည်းရေတပ်ပေါင်းစုမှူးက ယိုးဒယားမင်းမျိုးမင်းနွယ်ဖရာ့ယုံမာရတ်ထ်တဲ့။ ကျနော် ကြားဖြတ်ပြောချင်တာက ဘိုးတော်ဘုရားရဲ့မြန်မာတပ်တွေ ယိုးဒယားမြောက်ပိုင်းစစ်ပွဲတွေမှာ အဲဒီကာလက ယိုးဒယား တပ်တွေကို ဘယ်လိုဘယ်ပုံ ရှုံးနိမ့်ခဲ့တယ်ဆိုတာ ကျနော်မဖတ်ဖူးသေးဘူး။
ဖရာ့ထိုင်နန်ရဲ့တပ် နခွန်စီထမရတ်ကိုရောက်တဲ့အခါ နခွန်မြို့ဝန်ဆီက စစ်သင်္ဘော(၁၇)စီး ချက်ချင်းစစ်ကူရခဲ့ပေမဲ့ အဲဒီ အချိန်တုန်းက ကိုလန်တာမှာတပ်စွဲထားတဲ့ မြန်မာ့ရေတပ်ကို မယှဉ်နိုင်သေးဘူးဆိုပဲ။ထိုင်းအနောက်ဖက်ကမ်းရိုးတန်းရဲ့ အဓိက ရေတပ်အင်အားဟာ ကဒက်တဲ့။ ကဒက်မှာရှိတဲ့ မလေးနဲ့ပင်လယ်ဂျစ်ပဆီတွေဟာ ဒေသတွင်းပြိုင်ဖက်ကင်း ရေတပ်သူရဲကောင်းတွေလို့ဆိုတယ်။ ယိုးဒယားတွေအခက်တွေ့နေတာက ကဒက်ဆူလတန်ဟာ မြန်မာဘုရင့် သစ္စာတော် ခံဖြစ်နေတာပါပဲ။ဒါကြောင့် ဆွန်ခလာမြို့ဝန်ဟာ ကဒက်မြို့ဝန်ကို မြန်မာတွေနဲ့ ခွဲထုတ်ဖို့သုံးကြိမ်တိုင်တိုင် လက်ဆောင် ပဏ္ဏာဆက်ခဲ့ရသတဲ့။လက်ဆောင်ပဏ္ဏာဆိုတာ ဆန်အိတ်အပြည့်တင်ထားတဲ့သင်္ဘောတွေကို ကဒက်ဆိပ်ကမ်း၊ ထရန်းကို ပို့လိုက်ရတာတဲ့ဗျ။ အဲသလို ပေါ်ပေါ်တင်တင် လာဘ်ထိုးတဲ့အတွက် ဒေသတွင်း မတည်ငြိမ်မှုတွေဖြစ်လာပြီး ကဒက် စူလတန်ဟာ ယိုးဒယား မြန်မာစစ်ပွဲထဲကို ဇွတ်အတင်းအဓမ္မ၊ ပါလာခဲ့ရတယ်လို့ မလေးကဗျာဆရာကဆိုတယ်။
ကဒက်စူလတန်ရဲ့ လှေနံနှစ်ဘက်နင်းထားတဲ့အခြေအနေအပေါ် ဘန်ကောက်နဲ့နခွန်ရဲ့ကြိုတင်တွက်ဆချက်တွေဟာ မမှား ဘူးဆိုပဲ။နောက်ပိုင်းဖူးခက်တိုက်ပွဲမှာ အဖမ်းခံရတဲ့ မြန်မာတပ်မှူး ဇေယျသူရိယကျော်ရဲ့ အဆိုအရ ကဒက်စူလတန်ဟာ မြန်မာတပ်တွေဆီ လျှို့ဝှက်စာပို့ခဲ့တယ်။ ယိုးဒယားတပ်သား (၃၀၀၀) ချီတက်လာပြီမို့၊ သူတို့ကိုနှိမ်နှင်းပြီး ဘိုးတော်ဘုရား ရဲ့ ဘုန်းတော်ရိပ်အောက်ကို သွတ်သွင်းနိုင်ဖို့ မြန်မာတပ်သား (၆၀၀၀) စေလွှတ်ပေးဖို့ အကူအညီတောင်းခဲ့တယ်။ဒါပေမဲ့ ဖူးခက်မှာ ခြေကျွံနေတဲ့ မြန်မာတပ်တွေ ကဒက်ဖက်ကို ခြေဦးမလှည့်နိုင်တော့တာ သေချာတဲ့အတွက် ကဒက်စူလတန်ဟာ ယိုးဒယားကို တိုက်သင်္ဘော(၂၈)စီး အကူအညီပေးခဲ့တယ်။ဒီဇာတ်လမ်းကို နှောင်းလူတွေသိခွင့်ရတာကတော့ အဲဒီတိုက် သင်္ဘောအုပ်စုမှာပါတဲ့ မလေးကဗျာဆရာရဲ့ လွမ်းမောဖွယ်ကဗျာရှည်ကြီးကြောင့်တဲ့ဗျ။
ညီလင်းဆက်ကို ကျနော်ပြောခဲ့တဲ့ ထလန်တိုက်ပွဲဖြစ်ပြီး သုံးပတ်အကြာ (၁၈၁၀)ခုနှစ် ဇန်န၀ါရီလမှာ စစ်သင်္ဘော (၆၇)စီး၊ တပ်သား(၂၅၀၀) ပါတဲ့ မလေးယိုးဒယားပထမတပ်ပေါင်းစုဟာ ဖူးခက်ကိုရောက်လာခဲ့တယ်။ မြန်မာစစ်သင်္ဘောအများစု ဟာ မြောက်ဘက် ပက်ပရာတူးမြောင်းမှာ တပ်စွဲထားပြီး တချို့သင်္ဘောတွေက ကျွန်ဖမ်းထွက်နေကြသတဲ့။ ဘယ်လိုကျွန် မျိုး ဖမ်းနေခဲ့သလဲတော့ ကျနော်လည်း မတွေးတတ်ဘူး။တခုခုလွဲနေသလိုပဲ။
ဆက်ရေးထားတာကတော့ ယိုးဒယား၊မလေးမဟာမိတ်တပ်ပေါင်းစုဟာ မြန်မာကင်းလှည့်တပ်တွေမမြင်အောင် ကဘီးနဲ့ ကိုရိုးရိုင်ကျွန်းကြားမှာရှိတဲ့ အီကောနဂါးဆိပ်ကမ်းမှာ တိတ်တဆိတ်ကမ်းကပ်တယ်။တာလီဘောင်းသင်္ဘောအုပ်စုက ကပ္ပတိန် အီလက်ခ်ကို ရှေ့ပြေးကင်းထောက်ခိုင်းတယ်။အဲဒီကင်းထောက်အဖွဲ့မှာ ပါသွားတဲ့ မလေးကဗျာဆရာ မှတ်တမ်း တင်ထား တာကတော့ ….
`ထလန်ခံတပ်ကို မြန်မာတွေအတင်းထိုးစစ်ဆင်နေတယ်။ ကမ်းခြေတလျှောက်လုံးလည်း ၀ါးချွန်ဝါးညှောင့်တွေ ဒင်းကြမ်း ပဲ။ခံတပ်ထဲက လူတွေကတော့ ခုထက်ထိမာန်တင်း တောင့်ခံထားတုန်း။ဒါပေမဲ့ မြန်မာတွေဟာ ခံတပ်မြို့တစ်ခုလုံးကို ခြင်ထောင် ထောင်သလိုဝါးချွန်ဝါးညှောင့်တွေဆင်ပြီး သိမ်းတော့မှာမို့၊ဘယ်လိုစစ်ကူလာလာ၊ထလန်ခံတပ်ကျဖို့ မဝေး တော့ဘူး။ အမြောက်သံတွေကို မိုးချိန်းသလိုကြားနေရတယ်´ လို့ဆိုတယ်ဗျ။
(ဆက်လက်ဖော်ပြပါမည်။)
ရုပ်ပုံ။ ။ဂူဂဲလ်