ဖြစ်ပျက်ရှာပုံတော် ခရီးသည်
ခြောက်တန် နတ်ရွာ၊ ဝတိံသာလော ။
ထိုနေ့က ကျနော်နှင့်ကိုသက်ခိုင် ပင်မစခန်းဆီသို့ လှေတစင်းနှင့် ထွက်ခဲ့ကြသည်။ အချိန်ကား နံနက်ကိုး နာရီခန့်ဖြစ်၏။ စခန်းခွဲမှ အကျဉ်းသားများနှင့် ပတ်သက်သော အရေးကြီးစာရွက်စာတမ်း တချို့ကို ပို့ရန်ဖြစ်သည်။ ကိုသက်ခိုင်ကော ကျနော်ပါ လှေကိုကျွမ်းကျွမ်းကျင်ကျင် လှော်တတ်ကြသည်မဟုတ်သော်ငြား ကိုသက်ခိုင်၏ စရိုက်အတိုင်း လုပ်ကြည့်ရင်ဖြစ်မှာပါ ဟူသော ခံယူချက်ဖြင့် တောင်ကွေ့ မြောက်ချော် ဖြစ်သလို လှော်နေကြ ခြင်းဖြစ်၏။
“ ဟေ့လူ ကြည့်လုပ်အုံး၊ ခင်ဗျားလှေက ဗေဒါတောထဲ တိုးနေပြီ ”
ကျနော်က ပူပန်သည့်လေသံနှင့် သတိပေးသည်ကို ကိုသက်ခိုင်က ခပ်ပြုံးပြုံးမျက်နှာပေးဖြင့်၊
“ ဗေဒါဒိုက်ထဲကို လှော်တက်နဲ့ကန်ထားလိုက်လေဗျာ၊ မပူပါနဲ့ဗျ၊ ဒီချောင်းက ကျနော်တို့ တရပ် မနက်ပါဘူး၊ မသကာ ချောင်းထဲဆင်းပြီး တွန်းကြရုံပေါ့၊ လမ်းမှားမှာလည်း မပူနဲ့ ၊ ဒီချောင်းက ပင်မ စခန်းကနေ လမ်းမှာပြီး ဆူးလေဘုရားကို ရောက်မသွားမှာတော့ သေချာတယ်ဗျာ ”
မှန်လေစွ။ စင်စစ်ချောင်းကား ချောင်းမဟုတ်။ တူးမြောင်းသာဖြစ်၏။ လွန်ခဲ့သော နှစ်ပေါင်းများစွာ က ရေနက်ကွင်းအဖြစ် တည်ရှိခဲ့သော ဤနေရာတဝိုက်ကို ရဲဘက်များပို့လွှတ်လျှက် ရေနက်စိုက်ကွင်းအဖြစ် ပြောင်းလဲ ရန်အတွက် စီမံခဲ့ကြသည်ဖြစ်ရာ ချောင်းရိုးတို့သည် ပြင်ပကမ္ဘာနှင့် အဆက်အသွယ် ပြတ်တောက်လျက် ရှိလေသည်။
“ ဒါနဲ့ ခင်ဗျားက ဒီစိုက်ကွင်းမြေပုံတွေကို အလွတ်ရနေတာပဲ၊ ကုန်းပေါ်တက်ပြီး လွတ်ရာလွတ်ကြောင်း ထွက်သွားဖို့ စိတ်မကူးမိပေဘူးလား ကိုသက်ခိုင်”
“ လူသားပဲဗျာ၊ စိတ်ဆိုတဲ့အရာကလည်း သိပ်မြန်လွန်းတာမို့ အတွေးပေါ်မိတာ အကြိမ်ကြိမ်ပေါ့၊ ဒါပေမဲ့ဗျာ၊ ကျနော့်ကြောင့် ကျနော့်အပေါ် ယုံယုံကြည်ကြည် အခွင့်အရေးပေးထားတဲ့ ဝန်ထမ်းတွေ ပြဿနာ မဖြစ်စေချင်ဘူး၊ ထားလိုက်ပါဗျာ၊ ခင်ဗျား ဒီစကားကို လူတကာ လျှောက်မပြောပါလေနဲ့ ၊ ခြေကျင်းနဲ့ နီးတယ်”
ဤသို့လျှင် နှစ်ဦးသား တက်သမျှမှတ်သမျှ ကြိုးပမ်းလှော်ခတ်ခဲ့ကြရာ နံနက်ဆယ်နာရီခွဲခန့်တွင် ပင်မစခန်းသို့ ရောက်ကြသည်။လှေဆိုက်ရာနေရာကား ပင်မစခန်းသို့ ကိုသက်ခိုင် ရွေ့ပြောင်း နေထိုင်ရစဉ် အချိန်များ၌ ရေချိုးလေ့ရှိသော နေရာဖြစ်၏။ ကိုသက်ခိုင်၏ အိပ်ဆောင်ကား လှေဆိပ်နှင့် မလှမ်းမကမ်းတွင် မြင်နေရသော အစည်းအဝေးခန်းမနှင့် တွဲလျက်ရှိသော အခန်းငယ် ဖြစ်လေသည်။ကိုသက်ခိုင်တယောက် လှေပေါ်မှဆင်းလျှင် ဆင်းချင်း ထောင်ပိုင်ကြီးအိမ်ပေါ်သို့ တက်သွားပြီး စာရွက်စာတမ်းကိစ္စ ရှင်းပြချိန်မှာ စုစုပေါင်း နာရီဝက်မျှ သာဖြစ်၏။ ဆယ့်တစ်နာရီခန့်မှာ၊ ထောင်ပိုင်ကြီးအိမ်နှင့် မလှမ်းမကမ်းမှ ဖိုကြီးတွင် တာဝန်ခံမောင်ဝင်း၏ ဖိတ်မန္တကပြုချက်အရ မနက်စာစားကြသည်။ ထိုချိန်တွင်ပင် အကျဉ်းသားအဆောင်မှူးနှင့်တန်းစီးတချို့တို့ ရောက်လာပြီး အချိုပွဲအတွက် သူတို့ပိုင်ရာဆိုင်ရာ အိပ်ဆောင်အသီးသီးသို့ ဖိတ်ကြပြန်ရာ ကျနော့်မှာ ဘုန်းကြီး နောက်က လိုက်ပါရသော ကပ္ပိယနှင့်တူနေတော့သည်။
ပင်မစခန်းအဆောင်(၁)ပေါ်မှ ကိုသက်ခိုင်နှင့် အကျဉ်းသားအရာရှိများ ဆွေးနွေးပွဲကား နိုင်ငံတော် အရေးဖြစ်၏။ နိုင်ငံတော်ဆိုသည်ကား လွတ်ငြိမ်းချမ်းသာခွင့်ကို ဆိုသတည်း။ အများစုသိလိုသော မေးခွန်းခေါင်းစဉ်ကား မည့်သည့်အချိန်ကာလတွင် လွတ်ငြိမ်းချမ်းသာခွင့်လာမည်နည်းဟူ၏။စင်စစ် ထိုမေးခွန်း၏ ခန့်မှန်းအဖြေကိုလည်း မေးသူများကပင် ရှာဖွေထားကြပြီး ဖြစ်သည်။ ဘယ်နေ့ သတင်းစာ ဘယ်ဆောင်းပါးက ဘယ်စာကြောင်းမှာ ဘယ်လိုရေးထားတာကြောင့်၊ ဘယ် သူ့မိန့်ခွန်းမှာ ဘယ်လိုပါတာကြောင့် ၊ဘယ်ဘုရားကြီးပြီးတော့မှာကြောင့် ဟူသော တစ်ကြိုအဖြေများ အဆင့်သင့် ပါပြီးဖြစ်၏။ ကိုသက်ခိုင်ကား တဦးစီ၏ မေးခွန်းနှင့် အဖြေများကို ဖြစ်နိုင်ခြေ အနည်း အများ ထောက်ပြနေလေသည်။ သို့တစေ သူ့အဖြေကို သူကိုယ်တိုင် ကျေနပ်ဟန်တော့ မပြချေ။ မကြာပါချေ။ အလုပ်ဆင်းဘုတ်များပြန်တက်လာကြရာ အကျဉ်းသားအချို့ ကိုသက်ခိုင်ဘေးမှာ ဝိုင်းအုံလာကြပြန်သည်။
အချို့ကား သူတို့၏ လွတ်ရက်(ကွာ) တွက်ခိုင်းကြ၏။ အချို့ကား အိမ်နှင့်အဆက်အသွယ်ပြတ်နေသဖြင့် သဝဏ် လွှာပါးကြ၏။ အချို့ကား ဖုန်းနံပတ်ပေး၍ အဆက်အသွယ်ပြုစေရန် နားပူကြ၏။ အချို့ကား ကျန်းမာရေးအတွက် သောက်ဆေးစားဆေးမျိုးစုံကို ကိုသက်ခိုင်ထံမှ ပူဆာ၏။ အကူအညီတောင်းနေသော ရဲဘက်များနှင့် ကိုသက်ခိုင် တို့ အုပ်စုကို မြင်ရသည်မှာ တောရွာကျေးလက်တွင် ရောက်နေသော ဆေးဆရာ၊ ပျောက်စေဆရာအနီးအပါးမှာ တောသားလူနာတွေ ဝိုင်းအုံနေသည်နှင့် တူလှပေစွ။ ကိုသက်ခိုင်ကား တောင်းသမျှ အကူအညီကို ဆောင်ရွက် ပေးမည်ဟု ကတိ ပေးရင်း စာရွက်တရွက်မှာ အသေးစိတ် ရေးမှတ်နေလေသည်။ ဤစာရွက်တွင် ရေးမှတ်ထား သည့် ဆောင်ရွက်ဖွယ်ရာတို့ကား ကိုသက်ခိုင့်ဇနီး ထောင်ဝင်စာ လာသည့်အခါ အကောင်အထည် ပေါ်လာပေ လိမ့်မည်။ ကိုသက်ခိုင့်ဇနီးကလည်း ထိုထိုသော စုံစီနဖာအကူအညီတောင်းလေရာကို အိမ်ဦးနတ်စေသည့်အတိုင်း မငြီးမငြူ ဆောင်ရွက်မြဲဖြစ်၏။
ပင်မစခန်းမှ စခန်းခွဲ(၁)သို့ ကျနော်တို့ ပြန်လာချိန်ကား နေ့လည်တနာရီခွဲခန့် ရှိလေပြီ။ ကျနော်က လှော်တက်နှင့် ကမ်းစပ်က မြေမာမာကို ထောက်လျက် လှေကို ချောင်းလယ်သို့ ရောက်အောင် ရွှေ့ရင်း အငေါ်တူးလိုက်မိသည်။ ကိုသက်ခိုင်ကား လှေပေါ်တွင်ထိုင်ရင်း သူရေးမှတ်လာသော အကျဉ်းသားရဲဘက်တို့၏ မှာတော်ပုံမှတ်စုများကို ရေမစိုစေရန် ပလတ်စတစ်စဖြင့် အထပ်ထပ် ပတ်နေ၏။
“ ခင်ဗျားဗျာ ၊ဘေးက ကြည့်နေတဲ့သူတောင် ခေါင်းမူးတယ် ၊နိဗ္ဗာန်ကူးတို့ဆိုတာ ဒါမျိုးထင်ပါရဲ့”
“ နိဗ္ဗာန်အထိ မမှန်းကြောင်းပါဗျာ၊ အကြွေးဆပ်နေတယ်လို့ပဲ သဘောပိုက်ပါတယ် ”
ကျွဲမြီးနေသည့် ကျနော့်အမေးကို သူက လေသံအေးဖြင့် တုန့်ပြန်ပါသည်။
“ လုပ်ပါအုံးဗျ၊ ဘယ်လို အကြွေးဆပ်တာပါလိမ့်၊ အော် စီးပွားရေးလောက အထုတ်ရှုပ်ကြီးထဲမှာ ကာလများစွာ ကျင်လည်ခဲ့စဉ်က ကျနော့်ကြောင့် စိတ်ညစ်ခဲ့ရသူတွေ ၊နစ်နာရသူတွေ အများကြီး ရှိခဲ့ပါလိမ့်မယ်၊ တည့်တည့်ပြောရရင် အကုသိုလ်အလုပ်တွေ ရှိခဲ့မှာပေါ့ဗျာ၊ အခု ဒီဘဝမျိုးရောက်ချိန်မှာ ကျနော့်စိတ်ထဲ ငရဲတွင်းကလူတွေ ပျော်အောင်လုပ်ပေးချင်တယ်ဗျာ၊အကုသိုလ်အကြွေးတွေကို အခြေအနေပေးသလို ဆပ်နေတယ် ဆိုပါစို့ ”
လှေသည်ချောင်းရိုးအတိုင်း တရွေ့ရွေ့ ခရီးနှင်လျက်ရှိ၏။ ချောင်းဘေးဝဲယာမှ ငှက်ပျောပင်အုပ် ထူထူတို့၏ အရိပ်ကြောင့် ကျ နေ၏ အပူဒဏ်မှ သက်သာလျက်ရှိသည်။ နှစ်ဦးသား ပုံမှန်လှော်ခတ် လာကြရာ ခရီးတဝက်ခန့် အရောက်တွင် ကျနော်က စကားလမ်းကြောင်းတခုကို ခပ်ထေ့ထေ့ အစဖော်လိုက်မိ၏။
“ ဟေ့လူ ကိုသက်ခိုင် ၊ ခင်ဗျား နတ်ပြည်သွားတုန်းက ဒီလိုပဲ လှေလှော်သွားတာလားဗျ ”
“ ကြံကြံဖန်ဖန်ဗျာ၊ နတ်ပြည်ကို လှေနဲ့တော့ ရောက်ပါ့မလားဗျ၊ မသကာ လေယာဉ်ပျံတို့ ၊ဒုံးပျံတို့နဲ့ ဆိုရင် နည်းနည်းနီးစပ်သေးဗျာ ”
“ အော် ဒါဆို ခင်ဗျား စီးသွားတဲ့ယာဉ်က လေယာဉ်ပျံနဲ့များ တူနေရော့သလား”
“ ခင်ဗျားနဲ့တော့ ခက်နေပါပြီ၊ လေသံကြည့်ရတာ မယုံသလို ဖြစ်နေတယ်၊ ကဲပါဗျာ၊ ဟိုးရှေ့က မျှော်စင်ကြီး အောက်မှာ လှေခဏနားကြစို့ဗျာ၊ အခုမှ နှစ်နာရီခွဲဆိုတော့ စခန်းခွဲ ပြန်ရောက်လည်း ကိုးလိုးကန့်လန့် အချိန်ကြီး မျှော်စင်ပေါ်မှာ ခဏနားကြစို့ ”
သို့နှင့်ပင် ကျနော်တို့လှေကို မျှော်စင်ခြေရင်း ချောင်းစပ်တွင် ရပ်ကာ နှစ်ဦးသား မျှော်စင်ပေါ်သို့ တက်လာ ခဲ့ကြသည်။ မျှော်စင်ကား ပေခြောက်ဆယ်ခန့် မြင့်သည်။ တိုင်၊ ထုတ်ယောက်ဒိုင်းမြားနှင့် ကြမ်းခင်းပါ အားလုံးသစ်သားချည်းဖြစ်၏။ အကျဉ်းသားရဲဘက်တို့၏ အစွမ်းပြလက်ရာတည်း။ မျှော်စင်သည် ပင်မစခန်းနှင့် စခန်းခွဲ (၁)၏ ခရီးထက်ဝက်ခန့်တွင် တည်ရှိသည်။ဤမျှော်စင်ကား ရဲဘက်စခန်းသို့ လာရောက်ကြသော အရေးကြီးပုဂ္ဂိုလ်များကို ရဲဘက်စခန်းကြီးတခုလုံး၏ အနေအထားအား ရှင်းလင်းပြသရာ နေရာဖြစ်၏။ ရေနက်စိုက်ကွင်းအားလုံးကို၎င်း၊ ဘုတ်ဆင်းနေကြသော ရဲဘက်တို့အခြေအနေ အရပ်ရပ်ကို၎င်း အပေါ်စီးမှ မြင်နိုင်သည်။
မျှော်စင်ပေါ်တွင် လေတဟူးဟူး တိုက်လျက်ရှိ၏။ ကျနော်ရော ကိုသက်ခိုင်ပါ မျှော်စင်ဘေးက လက်ရန်းတိုင်တွေကို မှီရင်း ကောင်းကင်ဆီသို့ ခေါင်းမော့ကြည့်လိုက်မိကြသည်၊ ဘာရယ်မဟုတ်၊ အတွေးနှင့် အာရုံကို ဖြေလျှော့လိုက်ကြသည့် သဘော။ထိုစဉ် ကိုသက်ခိုင်ထံမှ စကားသံထွက်လာ ၏။
“ ကျနော် ရောက်ခဲ့တယ်ဆိုတဲ့ ခရီးဟာ ဒီလို ကောင်းကင်ကြီးကို ဖြတ်ပြီး နှင်ခဲ့တာပေါ့ဗျာ၊ နတ်ပြည်ဟုတ် မဟုတ်တော့ ခင်ဗျားကိုယ်တိုင်သာ အဖြေထုတ်ပေတော့၊ ဒီအကြောင်း ဘယ်သူ့ကိုမှ ပြောမပြဘူးလို့ ပိုင်းဖြတ် ခဲ့ဖူးပါရဲ့၊ ခင်ဗျားအနေနဲ့ နားထောင်ခွင့်ကြုံတယ်ဆိုမလား ။ အကြောင်း တိုက်ဆိုင်တယ်လို့သာ မှတ်ကြပါစို့ရဲ့ ”
ဟူ၍ အစချီလျက် ကိုသက်ခိုင် တသီတတန်း ပြောပြခဲ့သော အထက်မိုးလမ်းသွားခရီးစဉ် အတွေ့အကြုံ အပြည့်အစုံမှာ အောက်ပါအတိုင်းဖြစ်လေသည်။
“ ကျနော့်ရဲ့ အားထုတ်မှုတွေ တစတစ ထူးခြားလာတာကြောင့် ကျနော်ဟာ လေ့ကျင့်ခန်းကို နေ့ရောညပါ အားထုတ်လာပါတယ်။ အချိန်အကြာကြီးတော့ မဟုတ်ပါဘူး ။မနက် တနာရီ ညတ နာရီပါပဲ။ သို့သော် အဲဒီ တနာရီဟာ တကယ့်တနာရီပါ။ တကယ်အားထုတ်တဲ့ တနာရီပါ။ ကျနော့်ရဲ့ ဆံပင်တွေဟာ ကျနော်နဲ့မဆီ မဆိုင်သလို ဖြစ်လာတယ်။တသီးတခြားစီ ဖြစ်နေတယ်လို့ ခံစားလာရ တယ်။ ပြောင်းဖူးမွှေးတွေ လာတပ်ထားသလို စိတ်ထဲမှာ ခံစားရတယ်။ လက်မောင်းတွေ ခြေထောက်တွေဟာ အမှုံတွေ ဖြစ်သွားသလို ခံစားရတယ်။ ကျော်ဟိန်း ဆိုတဲ့သီချင်းလိုပဲဗျ။ ဘာတဲ့ ။ ငါဟာငါ မဟုတ် ဆိုတာမျိုး ခံစားရတယ်။ ဒီနေရာမှာ အလွန့်အလွန် အန္တရာယ် ကြီးမားတဲ့ အခြေအနေ တရပ်ကို ကျော်လွန်ခဲ့ရပါတယ်။ ပြန်တွေးကြည့်ရင် တော်တော် ကျောချမ်းစရာ ကောင်းပါတယ်။
ကျနော့်စိတ်ထဲမှာ သိပ်ပေါ့နေတယ်။ ဘာကိုမှ သိပ်လိုလိုလားလား မရှိတော့ဘူး။ နေရတာပေါ့ပျက် ပျက် ဖြစ်လာတယ်။ စိတ်တော့မညစ်ဘူး။ကျနော်ဟာ ကျနော်မဟုတ်ဘူးလို့ ချိန်တိုင်းခံစားရတယ်။
ကိုထွန်းထွန်းဦးတို့ တဲဆီက ပြန်တဲ့အခါ ချောင်းလေးကိုဖြတ်ပြီးရင် ကတ္တရာလမ်းမကြီးပေါ်ကို ရောက် တယ်။ ဓာတ်တိုင်ခြောက်တိုင်လောက် လမ်းလျှောက်မှ စခန်းအဝင်ဝကို ရောက်ပါတယ်။ စခန်းခွဲမှာ မဟုတ်ဘူးဗျ။ ထောင်ပိုင်ကြီး ခေါ်လို့ပင်မစခန်းမှာ နေရတဲ့အချိန်ဗျ။ဒီလိုပဲ ပင်မစခန်းမှာ နေရတဲ့ အချိန်တွေရှိပါတယ်။
အဲဒီရက်တွေမှာ အဲဒီလမ်းကို ကျနော်လျှောက်ခဲ့တဲ့ လေးငါးကြိမ်မှာ ကျနော်ဟာ ကျနော်လုပ်နေတဲ့ အလုပ်နဲ့ တော်တော်ဖီလာဆန့်ကျင်ဖြစ်တဲ့အတွေးတွေ ပေါ်ခဲ့ပါတယ်။ အဲဒီ အတွေးကတော့ ငါဘာမှ မဟုတ်ပါလားဆိုတဲ့ အတွေးပါပဲ။ ဟုတ်ပါတယ်။ ကျနော်ဟာ စိတ်မညစ်ပဲ လူ့လောကကြီးမှာ နေရတာကို ဘာအဓိပ္ပါယ်မှမရှိသလို ပြင်းပြင်းထန်ထန် ခံစားခဲ့ရပါတယ်။ ကြိမ်ဖန် များစွာ ခံစားလာရတဲ့အခါ ကျနော်ဟာ ကတ္တရာလမ်းပေါ်လျှောက်ရင်း အဝေးက မောင်းလာနေတဲ့ ကားအောက်မှာ ခေါင်းဝင်ထိုးလိုက်ပြီး အသေခံလိုက်ရင် ကောင်းမယ်ဆိုပြီး တွေးမိ လာပါတယ်။
စိတ်ညစ်လို့မဟုတ်ဘူးဗျ။ စိတ်ထဲမှာ ဘာအဓိပ္ပါယ်မှ မရှိသလို ခံစားရလို့ ၊သေလိုက်တာမှအဓိပ္ပါယ် ရှိမယ်ဆိုတဲ့ အတွေးတွေဟာ ပြင်းထန်လွန်းတာကြောင့် တကယ့်ကို ကားတိုက်အသေခံဘို့ အကြိမ်ကြိမ် ဖြစ်ခဲ့တော့တာ ပဲ။ဒါပေမဲ့ ကျနော်ဟာ ငါအတွေးတွေ ဘာကြောင့်ပေါ်လာသလဲ။ ငါဘာမှားနေ လဲ။ဘာဘဲဖြစ်ဖြစ် ဒီအတွေးဟာ သဘာဝမကျဘူး။ သဘာဝမကျဘူး ဆိုပြီး အထပ်ထပ် အဖန်ဖန် ကိုယ့်ကိုယ်ကို ဆုံးမရပါတယ်။ ကံကောင်း ထောက်မစွာဘဲ ဆယ်ရက်ဝန်းကျင်လောက် အကြာမှာ အဲဒီခံစားချက် အတွေးတွေ ပျောက်ကွယ် သွားပါတယ်။ ကျနော့် လေ့ကျင့်ခန်းကတော့ ရပ်မသွား ပါဘူး။ ကံကောင်းလို့ မသေ သံချောင်းတို့ အဖေပါပဲ ဗျာ။
ခင်ဗျား ခေါင်းရှုပ်သွားပြီ မဟုတ်လား။ အဲဒါ ဖြစ်ရိုးဖြစ်စဉ်ဗျ။ ဟုတ်တယ်။ လေ့ကျင့်မှု ပြင်းထန်ထိရောက်လာတဲ့ အခါ ငါ ဆိုတဲ့ တွေးထင်ချက်တွေ လုံးလုံး ပျောက်ကွယ်သွားတယ်။စာတွေထဲမှာ ဒါဟာ အတ္တဒိဌိကင်းလာ တဲ့အတွက် ဖြစ်လာရတယ်လို့ဆိုသဗျာ။ခင်ဗျားကြားဘူးမှာပါ။ ဘုရားရှင်လက်ထက်ကတောင် ရဟန်းငါးရာဟာ ကိုယ်လည်ပင်းကိုယ်လှီးကြပြီး သတ်သေကြတယ် ဆိုတာမျိုး ထင်ပါရဲ့ဗျာ။
တော်တော် အန္တရာယ်ကြီးတယ်ဗျာ။ တွေးမိရင် ခုထက်ထိ လန့်သလိုလို ဖြစ်တုန်း။ ဘာကြောင့်ဖြစ်တယ်လို့ ထင် သလဲ ။ဆရာ အနီးကပ် ဆရာမရှိတဲ့ အမှားဗျ။ လေ့ကျင့်ခန်းလုပ်မယ်လို့ စိတ်ကူးသူတွေ သတိကြီးကြီး ချပ်သင့်တဲ့ အဆင့်ပေါ့ဗျ။ ကျနော်ဟာ ဆင်ခြင်ရင်း လေ့ကျင့်။လေ့ကျင့်ရင်း ဆင်ခြင်နဲ့ အဆင့်တော်တော်များများကို ကျော်ခဲ့ရ ပါတယ်။အဖြေသိချင်တဲ့ ပုစ္ဆာပေါင်းများစွာ ကျနော့်အတွေးတွေမှာ ဖြစ်လာခဲ့တယ်။ ဥပမာ၊ တရားတွေ့ဘို့ တရက်၊ တမနက်၊ ခုနှစ်ရက် ၊ခုနှစ်လ၊ ခုနှစ်နှစ် အကြာမှာ ရတတ်တယ်ဆိုတာ ဘယ်သူက ဘာအထောက်အထားနဲ့ တွက်ချက် ထားတာ လဲ ဆိုတာမျိုး ကအစပေါ့။သို့ သော် လေ့ကျင့်ခန်းကတော့ မပျက်ဘူး။
ကျနော်ဖြတ်သန်းခဲ့တဲ့ လေ့ကျင့်ခန်း အပြည့်အစုံကို ပြန်ပြောပြဘို့ဆိုတာ ဘယ်လိုမှ မဖြစ်နိုင်ပါဘူး။ ကျနော့်မှတ် ဥာဏ်မှာ ပေါ်လာတာလောက်ကိုသာ ကျနော်ပြန်ပြောနိုင်တာပါ။
…………………………………………….
အေးဗျာ။ ကျနော်လေ့ကျင့်ခန်း လုပ်ခါစက မှန်သောစကားတခုကို တရားမထိုင်ခင် ဆိုလေ့ရှိတယ်။ ကြားဖူးနားဝ အဆိုအမိန့်တွေနဲ့ မှန်သောစကားတခုနဲ့ အခြေတည်ဘို့ ကျနော့်ခေါင်းထဲ ရောက်လာတယ်။ အချည်းအနှီး မဖြစ်လောက်ဖူးလို့ ယုံကြည်တာနဲ့ ဆိုမဲ့သစ္စာကို သေချာစဉ်းစားခဲ့တယ်။ ဆရာကြီးဦးသုခ ပြောဘူးတာက မှန်ဘို့သာလိုတယ်။နှစ်သက်ရာ သစ္စာစကားကို ဆိုနိုင်တယ် ဆိုပေမဲ့ ကျုပ်ကတော့ ဆိုမဲ့သစ္စာကို သေချာ ရွေးခဲ့တယ်။ ဘယ်လိုဆိုဆို။ဘယ်လိုစဉ်းစားစဉ်းစား ဒေါင် ဒေါင်မြည်မှန်နေရမယ်ဆိုပြီးရွေးဘို့ စဉ်းစားတော့ ကျနော့်အမေကိုပြေးသတိရတယ်။ ကျနော့်ဘဝမှာ အမေမသေခင် ကျနော်ပြုခဲ့တဲ့အလုပ်တွေအတွက် ကျေနပ်ခဲ့ဘူး တယ်။ကျနော်က ရှုပ်သလောက် အမေက တကယ့်ရိုးရိုးအေးအေး တောသူဗျ။အဖေက ဥပဓိရုပ် ကောင်းပေမဲ့ အမေကတော့ ရွက်ကြမ်းရေကျိုရုပ်ရည်ပါ။အဖေက အဖွားစကားနားထောင်ပြီး အမေ့ကို လက်ထပ်ခဲ့တာလို့ အမေ က ခဏခဏ ပြောဘူးတယ်ဗျ။
သစ္စာဆိုဘို့အကြောင်းက အမေ ကျောက်ကပ်သွေးတိုးနဲ့ ဆေးရုံတင်ရတော့ ဒေါက်တာပိုင်စိုး (နောင် ကျန်းမာရေး ဒုတိယဝန်ကြီးဖြစ်လာသူ)က ကျနော့်ကိုခေါ်ပြီး ရောဂါအခြေအအနေ ကိုရှင်းပြတဲ့အချိန်မှာပေါ့ဗျာ။ ကျောက်ကပ်လဲ ဘို့နည်းလမ်း။ကျောက်ကပ်ကိုထုတ်ပြီး နှစ်ပါတ်တခါ သွေးထဲက အညစ်အကြေးတွေဆေးတာတွေ စုံလို့ ပါပဲ။
ကျနော်ကလည်း အမေနဲ့ပတ်သက်ရင် နဲနဲထူးဆန်းတယ် ပြောရမလား။ အဖေဆုံးပြီး အနှစ်နှစ်ဆယ်လောက် အတွင်းမှာ အမေဟာ သူ့သမီးတွေနဲ့ပဲ တလှည့်စီ နေနေတာ။ ကျနော့် စိတ်ထဲ၊ တမျိုးတမည် ခံစားမိတာနဲ့ မဆုံးခင် တလအလိုမှာ ကျနော့်ညီမအိမ်ကနေ အမေ့ကို ကျနော့်အိမ်ဆီ၊ ဇွတ်ခေါ်လာခဲ့တာဗျ။ ခါတိုင်းလည်း တလတခါ ကျနော်ကိုယ်တိုင် ဒေါက်တာမြဦး(ဒုတိယကျန်းမာရေးဝန်ကြီးပါပဲ။)နဲ့သွားပြနေကျပါ၊ဆေးဝါးတွေရော၊ အစား အသောက်ကအစ လမ်းလျှောက် လေ့ကျင့်ခန်းအဆုံး သေချာ ကျနော်ဂရုစိုက်ခဲ့ပေမဲ့ကျနော့်အိမ်ရောက်လို့ တလမပြည့်ခင် အမေ ဈေးသွားရင်း မူးလဲပြီး ဆေးရုံရောက်ခဲ့တာပါပဲ။
ကျနော့်စိတ်ဟာ အမေ့အကြောင်းဆီလည်းရောက်ရော ကျနော်ဆိုရမဲ့ သစ္စာကို ထင်းကနဲခေါင်းထဲမှာ ပေါ်လာ တယ်။ တပည့်တော်ဟာ မိခင်မသေခင် အတတ်နိုင်ဆုံး၊အကောင်းဆုံး ပြုစုကုသခဲ့ပါတယ်။ ဒီသစ္စာမှန်ရင် တကယ့်အမှန်တရားကို တွေ့ ရပါစေပေါ့ ဗျာ။
အထပ်ထပ် စဉ်းစားလေ ၊ကျနော့်သစ္စာဟာ မှန်လေပဲဗျာ၊ အရာရာကို တဇွတ်ထိုး လုပ်တတ်တဲ့ ကျနော်ဟာ ကျောက်ကပ်လဲဘို့ဆရာဝန် ပြောတာလည်း နားထောင်ပြီးရော။ ဆေးရုံအောက်ထပ်မှာ စောင့်နေတဲ့ ကျနော့် ညီဆီ ပြေးသွားပြီး ဟေ့ကောင်၊ အမေ့ကျောက်ကပ်ကို လဲလို့ရတယ် ပြောတယ်ကွ။ဒါက သွေးသားအရင်း သားသမီးတွေမှ ရတယ်ပြောတယ်။ မင်းနဲ့ငါ တယောက်တလုံး ကျောက်ကပ်ထုတ်ပြီး အမေ့ကိုကုကြရအောင် ဆိုတော့ကျနော့်ညီက တို့ကျောက်ကပ် ထုတ်လိုက်ရင် တို့ က ဘာဖြစ်မလဲတဲ့။
သူလည်း အမေကို ချစ်ပေမဲ့ နည်းနည်းတော့ တွန့်နေတယ်။ ကျနော်က ဟေ့ကောင် အမေ့အတွက် ဆို သေလည်း ဘာဖြစ်လဲကွလို့ ဇွတ်တွန်းတာပဲ။ကျနော့်စိတ်ထဲမှာ ကျောက်ကပ်ကို နှစ်လုံးစလုံး လဲပစ်ရမယ် ထင်လို့ဗျ။ တကယ်ကို ကျနော်ဟာ အမေ့ကို ကျနော့်အသက်နဲ့ လဲပြီး ကုချင်စိတ် ပြင်းထန်နေခဲ့တယ်။ တကယ်တမ်းတော့ မလဲဖြစ်ခဲ့ဘူးဗျာ။ အမေဟာ ကျောက်ကပ်လဲတဲ့ ဒါဏ်ကို ခံနိုင်ရည်မရှိဘူးဆိုပဲ။ဆေးရုံမှာ ဆုံခဲ့တဲ့အသိဆရာမ တယောက်က ရှင် အမေကိုကုသဘို့ ဒီလို စိတ်မျိုးထားတာ ဘယ်တော့မှဒုက္ခကြီးကြီး ကျယ်ကျယ်မရောက်ဘူးလို့ ပြောခဲ့ဘူးတာ လည်းပါ တယ်။အခု ဒုက္ခရောက်နေပြီ။ ဒါကို သစ္စာအဖြစ်ဆိုမှလို့ ဆုံးဖြတ်ခဲ့တာပဲ။ တော်တော် အသုံး တည့်တယ်ဗျာ။ဒီ သစ္စာကိုဆိုလိုက်တိုင်း ကျနော်ဟာ ကမ္ဘာလုံးကြီးပေါ်မှာ ထိုင်ပြီး အလွန်မာကျော တဲ့သံမဏိချောင်းကြီးလို အရာမျိုးနဲ့ မြေကြီးထဲကို ရိုက်သွင်းလိုက်တာ အဆုံးတိုင် ဝင်သွားသလို ခံစားရ တယ်။ဒါတွေလည်း ကြောင့်လည်း ထူးထူးဆန်းဆန်းတွေ ဖြစ်တာလည်း ပါချင်ပါမှာပေါ့ဗျာ။ ကျနော့်မှာ နတ်မျက်စိမှ မရှိတာ၊ အသေအချာတော့ မသိနိုင်ဘူး။
ဒါတွေ ကျနော်ပြောနေတာ အကြောင်းရှိတယ်ဗျ။ ခင်ဗျားစိတ်မှာ သိပ်အံသြနေတော့ ကျနော့် လုပ်ပုံကိုင်ပုံက သူတပါးတွေထက် ထူးခြားတယ်လို့ တွေးနေမှာစိုးလို့။အခု ကျနော်လုပ်ခဲ့သမျှက အားလုံး ရိုးရိုးစင်းစင်း ချည်းပဲဗျ။ဆိုပါတော့၊ သီလယူတယ်ဗျာ၊ ငါးပါးသီလ ရိုးရိုးပါပဲ၊ စလုပ်တဲ့ နေ့ကဆို အသက်သတ်တာ၊ခိုးတာ၊ အိမ်ရာပစ်မှားတာ၊လိမ်ပြောတာ ၊မူးယစ်တဲ့အရာ ရှောင်တာ တွေရွတ်တော့၊အစီအစဉ်တကျ မရွတ်နိုင်လို့။ နှစ်ရက်သုံးရက်နေမှ ဟန်ကျသွားတယ်။ သီလ မစောင့်လို့ မရဘူးလား၊ ဟုတ်လား။ မရဘူး။ စောင့်ကိုစောင့်ရမယ်။ အဲဒီ စောင့်ထိန်းမှုကမှ အမှန် တရား ထွက်ပေါ်လာနိုင်တယ်ဆိုတာ ပုံသေနည်းဗျ။
ဒီလိုနဲ့ ကျနော့်ဘဝမှာ အထူးခြားဆုံး ။အထူးဆန်းဆုံး။လူတွေ မယုံနိုင်စရာ အကောင်းဆုံး၊သံသယ တွေ တထွေးကြီး ပွားစရာအကောင်းဆုံး၊ ပြန်ပြောခဲ့ရင် အကျိုးရှိပါ့မလား။ ပြောကောပြောသင့်ရဲ့လားလို့အကြိမ်ကြိမ် အထပ်ထပ် တွေးခဲ့ရတဲ့ ဖြစ်ရပ်၊ ကြုံတွေ့ခဲ့ရတဲ့နေ့ကို ရောက်လာပါတော့တယ်။ကျနော်ဟာ ပင်မရဲဘက်စခန်းမှာ ရောက်နေတဲ့ ရက်တရက်ပေါ့။ပင်မစခန်းဟာ စခန်းခွဲ နဲ့ လေးမိုင်နီးပါးဝေးပါတယ်။
ခါတိုင်းလိုပဲ အိပ်ရာက နိုးခဲ့ပြီး လေ့ကျင့်ခန်း လုပ်ခဲ့ပါတယ်။ အဲဒီနေ့ကကျနော် အိပ်ခဲ့တဲ့ နေရာဟာ ပင်မစခန်းရဲ့ အစည်းအဝေးခန်းမကြီးနဲ့တွဲရက် ဧည့်သည်ထောင်မှူးတွေ တည်းဘို့သီးခြားဖွဲ့ထားတဲ့ အခန်းငယ်လေးပါ။ ဆယ်နှစ်ပေ။ ဆယ့်ခြောက်ပေလောက် ရှိတယ်။အုတ်နံရံကပ် အဆောက်အဦး ပါ။အဲဒီ အခန်းထဲမှာ ကျနော်အိပ်တဲ့ လက်ရာခပ်ကြမ်းကြမ်းသစ်သားကုတင်တလုံးနဲ့ ကုတင်ဘေး မှာ သစ်သားသေတ္တာတလုံးရှိပါတယ်။ မြေပုံတွေတချို့ စာရွက်စာတမ်းတွေ ထည့်သိမ်းထားတာပါ။ အဲဒီ သေတ္တာပေါ်မှာ မောင်မင်းကြီးသား အီးတီ့အဖေ ထိုင်ခဲ့တာပေါ့။ ခင်ဗျားသိပြီးသား ဖြစ် ချင်ဖြစ်မယ်။ မှတ်တမ်းဖြစ်စေချင်တာကြောင့် အသေးစိတ် ပြောနေတာ ဗျ။
အဲဒီ အဆောင်ရဲ့ ရှေ့ မှာ ပန်းခြံရှိတယ်။ အကျဉ်းသားတွေ ပြုစုပျိုးထောင်ထားတာဗျ။ပန်းခြံလွန်ရင် အကျဉ်းသား အဆောင်တွေဆီကို သွားတဲ့ ကတ္တရာလမ်းကျဉ်းလေး ရှိတယ်။ကတ္တရာလမ်းဘေးမှာ စခန်းခွဲကိုရောက်တဲ့ ချောင်းရှိတယ်။ အဲဒီချောင်းမှာ ကျနော်ရေဆင်းချိုးတဲ့ အကြိမ် အတော်များများမှာ ကျနော်ဟာ တဖြည်းဖြည်း ပေါ့သထက်ပေါ့လာတာကြောင့် ကျနော့်ကိုယ်ကျနော် ရေထဲမှာ လုံးလုံးပေါ်နိုင်ပြီလားလို့အကြိမ်ပေါင်းများစွာ လူမသိသူမသိ စမ်းခဲ့ဘူးတာပေါ့။ နည်းနည်းတော့ ကြောင်သလိုလိုပဲ။ပေါ်သလား၊ ဟုတ်လား။ ရေကူးဘို့မခက် လောက်အောင်တော့ အလွန့် အလွန်ပေါ့ပြီးပေါ်တယ်ဗျ။လုံးလုံးတော့မပေါ်ဘူး။မြှုပ်မြှုပ်သွားတယ်။ ဘာလို့စမ်းသလဲ ဆိုတော့ ၁၄-နှစ် အသက်ရှူလေ့ကျင့်ခန်း လုပ်ခဲ့တဲ့ဗီယက်နမ် သီလရှင်ကြီးတပါး ရေထဲမှာ ပေါ်နေနိုင်တာကို ဖတ်ဘူးလို့ ဗျ။
ကျနော် မနက်ပိုင်း အဲဒီချောင်းထဲမှာ ရေချိုးလေ့ရှိတယ်။ဒီမနက်လည်း ရေချိုးဘို့ဆိုပြီး အခန်းထဲကနေ ချောင်းဘက်ဆီကို လျှောက်ခဲ့တယ်။ပြင်ပ လောကကြီးဟာ သာမန်ပါပဲ။ဒါမဲ့ကျနော့် စိတ်ထဲမှာ တမျိုးထူးခြား နေတယ်။ စိတ်ဟာ လန်းဆန်းပေါ့ပါးနေတယ်။ ကြောင့်ကျမှုအားလုံး ကင်းစင်နေတယ်။ ကျနော် ကောင်းကင်ကို မော့ကြည့်လိုက်တယ်။ နေ့အလင်းရောင်ဟာ မပီပြင်သေးပါဘူး။ နွေနဲ့မိုး စပ်ကူးမတ်ကူး အချိန်ပါ။ ကောင်းကင် ပြင်ကြီးမှာ တိမ်ပါးပါးတချိုိ့ရှိနေတယ်။ ကျနော်ဟာ လမ်းခင်းကျောက်ပြား တချပ်ပေါ်မှာ ရပ်နေတယ်။ နေရောင်မမြင်ရသေးပါဘူး။ ကျနော့်ပတ်ဝန်း ကျင်မှာရှိနေတဲ့ သစ်ပင်နိမ့်နိမ့်အုပ်အုပ်ကလေးတွေ ။မလှမ်းမကမ်းက ချောင်းငယ်။ ရှိသမျှနဲ့ ဖြစ်သလိုကာထားတဲ့ ပန်းခြံက ရောင်စုံသစ်သားတန်းလေးတွေ အားလုံးဟာ သာမန်ပါပဲ။ သာမန် မဟုတ်တာက ကျနော့်စိတ်ဗျ။ ကောင်းကင် ကိုမော့ကြည့်မိပြန်တယ်။
ဘာများထူးခြားနေလို့လဲ။ ခါတိုင်းနေ့နဲ့ ဘာကွာနေတာလည်း။ ငါ့စိတ်ဘာဖြစ်နေတာလဲ၊ဆိုပြီး တွေးနေတယ်။ စိတ်ဆိုတဲ့ခေါင်းစဉ်နဲ့လည်း တွေးလိုက်ရော။ ကျနော့်ရင်ထဲမှာ စကားလုံးနဲ့ မဖော် ပြနိုင်တဲ့အလွန်ချမ်းမြေ့တဲ့ခံစားမှုတခုကို သတိချပ်မိတယ်။ မှန်ပါတယ်။ ကျနော့်စိတ်မှာ ဒီနေ့ ဒီအချိန် လောကကြီးဟာ သာယာလှချည့်လား။
ကြည်နူးဘို့ကောင်းလှချည့်လား။ ကျနော့်ရဲ့ နှလုံးအိမ်တနေရာက ထွက်လာတဲ့ အလွန်နူးညံ့ ကြည်နူးဖွယ်ကောင်းတဲ့ လှိုင်းတမျိုး တရှိန်ရှိန် တငွေ့ငွေ့ထွက်နေတာကို ကျနော်အကြာကြီး ခံစား နေမိပါတယ်။ ခင်ဗျား စဉ်းစားကြည့်စမ်းပါ။ ရဲဘက်ကို ရောက်နေတဲ့ အကျဉ်းသားတယောက်ဟာ စွပ်ကျယ်ဂျိုင်းပြတ်ကို ဝတ်ပြီး လမ်းခင်းကျောက်ပြားပေါ်မှာ မနက်စောစော ကောင်းကင်ကြီးကို ရပ်ကြည့်တာ ဘာ၊ စိတ်ချမ်းသာစရာ ရှိသလဲ။ သေချာတာက အေးချမ်းမှုဟာ ကျနော့်ကိုယ်ခန္ဓာ အတွင်းပိုင်းဆီက ထင်ထင်ရှားရှား ထွက်ပေါ်လာနေတာပါပဲ။ သာယာလိုက်တဲ့ လောကကြီးဗျာ။ နေချင့်စဖွယ်ကောင်းလိုက်တဲ့ လောကကြီး။ ညစ်ညူးစရာဘာတခုမှ မရှိတဲ့ လောကကြီးလို့ ကျနော့်စိတ်မှာ အထပ်ထပ် ကျူးရင့်နေမိတော့တာပါပဲ။ ဒီလိုနဲ့ ကျနော့် ဘဝရဲ့ အလွန်ထူးခြားသော နေ့ ရဲ့ အစဟာ အလွန်ကြည်နူးဖွယ်နံနက်ခင်းနဲ့ စတင်ခဲ့ပါတယ်။
ရေချိုးပြီး ပြန်တက်လာတော့ အဝတ်အစားလဲပြီး ထုံးစံအတိုင်း ဆရာကြီး ဦးဂိုအင်ကာ ရဲ့ ဓမ္မရေစီး ဆိုတဲ့ စာအုပ်ကို ဖတ်ပါတယ်။ ဆရာသက်ကြီးရဲ့ စာအုပ်ထဲက တချို့ မရှင်းလင်းတဲ့စာပိုဒ်တွေ ။အခန်းတွေကို ဖတ်တယ်။ ကျနော့်စိတ်ဟာ တည်ငြိမ်လန်းဆန်းနေပါတယ်။
ဆယ်တစ်နာရီလောက်မှာ ကျနော်နဲ့ အတူနေတဲ့စားဖိုတာဝန်ခံ မောင်ဝင်းက ထောင်ပိုင်ကြီး အတွက် ထမင်းပြင်ဆင်ပေးပြီးတဲ့နောက်၊ ကျနော်တို့ စားအိုးတွဲ သုံးယောက်အတွက် ထမင်းဝိုင်း ပြင်ပါတယ်။ ခရမ်းချဉ်သီးနဲ့ဘဲဥရောမွှေထားတဲ့ဟင်းနဲ့အရွက်ဟင်းချို ခပ်ရိုးရိုးပုံမှန်ပါပဲ။စားနေ ရင်းလည်း ထမင်းလုပ်ကို စယူတာက အစ။ပါးစပ်ထဲရောက်၊ ဝါးနေ၊မျိုချ မှတ်လို့ရသမျှ၊ ဟင်းချို သောက်ချိန် ဇွန်းကိုင်တာကအစ အကုန်မှတ်နေပါတယ်။
ထမင်းစားပြီးတော့ အခန်းဖက်ကို ပြန်လာပြီး စားပြီးတဲ့အခါ ငါ့ခန္ဓာကိုယ် ဟာဘယ်လိုနေသလဲ ဘာပြောင်းလဲ သလဲ။ဆင်ခြင်ပါတယ်။စားပြီးတဲ့အချိန်ဟာ မစားခင်ထက် မှတ်ရတာ ပိုလေးတယ်။ ပိုခက်တယ်။
နေ့လည် တနာရီလောက်ကျတော့အကျဉ်းသားတွေကို ဘုတ်ပြန်ထုတ်တယ်။ နေ့လည်ပိုင်း အလုပ်ပြန်ဆင်း တာလေဗျာ။ နေ့လည်တနာရီခွဲလောက်မှာ ကျနော် ကိုထွန်းထွန်းဦးတဲဆီကို ထွက်ခဲ့တယ်။ သူ့တဲဆီကူးတဲ့ တံတား လေးက ရေမြှုပ်နေလို့ ဖိနပ်ချွတ်ပြီး ကူးခဲ့ရတယ်။ တဲရဲ့ နောက်ပိုင်းမှာ ဘေးဖက်က ဝင်လို့ရတဲ့ဝါးကဲလား နဲ့လုပ်ထားတဲ့ အပေါက်ဖက်ကနေ ကျနော် ဝင်ခဲ့တယ်။ကိုထွန်းထွန်းဦးဟာ တဲထဲမှာ ခြင်ဆေးတိုင်တတိုင်ထွန်းပြီး တရားထိုင်နေပါတယ်။ ဆယ်မိနစ်လောက်ကြာအောင် ကျနော် ထိုင်စောင့်နေပါတယ်။ မှတ်လျက်ပါပဲ။
သူက တရားဖြုတ်ပြီး ရေနွေးအိုး ချတည်ပါတယ်။ ကျနော်က ထိုင်ရတာ အဆင်ပြေရဲ့လား ဆိုတော့သူက၊ အေးဗျာ။ ဒီမှာက တရားစခန်းလောက် မှတ်လို့မကောင်းဘူးဗျတဲ့။ကျုပ်က ကိုထွန်းထွန်းဦးရယ် ရောက်တဲ့နေရာ စခန်းလို့သာ မှတ်ပါတော့လို့ပြောတော့ သူက ဟုတ်တယ်ဗျ။အဲသလို စိတ်မျိုးထားရမှာ ။ခင်ဗျားထားနိုင်တာ အကျိုးရှိမယ်။ လို့ဆိုပါတယ်။အဲဒီ အကျိုးဟာ နောက်တနာရီ ကျော်လောက်မှာ ဖြစ်လာတော့မယ်ဆိုတာ ကျနော်ကြိုမသိခဲ့ပါဘူး။
ကျနော့်စိတ်ထဲမှာ တမျိုးဖြစ်လာတာနဲ့ကိုထွန်းထွန်းဦး သစ္စာလေးပါးဆိုတာ ကျနော့်ကို ဟောပြ စမ်းပါဆိုတော့ သူက သူနားလည်သလောက် ဒုက္ခသစ္စာ။သမုဒယ သစ္စာ။မဂ္ဂသစ္စာ။နိရောဓသစ္စာ ဆိုပြီး ပြောပြပါတယ်။ ကျနော်ဟာ အဲဒီတရားကို ဒီထက်သိချင်စိတ် ပေါ်လာနေပါတယ်။ သို့သော် ဥာဏ်ကမမှီပါဘူး။ဒုက္ခဆိုတာ ထောင် ထဲရောက်တုန်း ပြောကြတာကလား။
သစ္စာထိုက်တဲ့ ဒုက္ခဟာဘယ်လိုဟာမျိုးလည်း ကျနော်သိချင်စိတ်တွေ အဆက်မပြတ် ပေါ်နေခဲ့ပါ တယ်။ တွေးရင်းမှတ် မှတ်ရင်းတွေးနဲ့ ကျနော်လုပ်နေတာတွေကို ကိုထွန်းထွန်းဦးသိပုံမရဘူးဗျ။
သုံးနာရီ မထိုးခင်မှာ တဲကအဆင်းကနေ စမှတ်ပြီး ပြန်ခဲ့တယ်။ ကတ္တရာလမ်းပေါ်ရောက်တော့ ကျနော့်စိတ်ထဲမှာ ကျနော့်ခြေထောက်တွေကို သစ်သားချောင်းတွေလို ထင်လာတယ်။ခြေတလှမ်း လှမ်းတိုင်း သစ်သားချောင်းတွေက ကတ္တရာလမ်းကို သွားသွားထောက်မိလို့ ဒုတ်ဒုတ် ဒေါက်ဒေါက် အသံတွေကို ကျနော့်နားမှာ ကြားနေရ တယ်။ဒီလိုနဲ့ညက အိပ်ခဲ့တဲ့အခန်းထဲကို ပြန်ရောက်လာပါတယ်။ အခန်းထဲကိုရောက်တော့ ကုတင်ဆီကို လျှောက်သွားလိုက်တယ်။နောက် ကုတင်ပေါ်ကို ထိုင်မိတော့မဲ့ဆဲဆဲမှာပဲ ကျနော့်အတွက် အံ့သြမကုန်နိုင်တဲ့့အဖြစ်ကိုကြုံရပါတော့တယ်။
ဟုတ်ပါတယ်။ ကျနော့်ခန္ဓာကိုယ်ဟာ တခုခု ထူးခြားနေပါပြီ။ ဘာဖြစ်နေသလဲ၊ စူးစမ်းစိတ်ဟာ ထပ်ချပ်မကွာ ပါနေပါတယ်။ စက်နှိုးသံလိုလို ကြားသလိုပဲ။ အင်ဂျင်စက်တခုခုကို ငြင်ငြင်သာသာ နှိုးနေတဲ့အသံပါ။အဲဒီ အသံဟာ ကျနော့်ခန္ဓာကိုယ်ထဲက လာနေပါတယ်။သတိကို မပြတ်တမ်း ချပ်ထားလျက်ပါပဲ။ စက်နှိုးတဲ့အသံဟာ ပီပြင်သထက်ပီပြင်လာပါတယ်။ ပိုပြီး ပြင်းလာပါတယ်။ သေချာ သွားပါပြီ။ ကျနော့်ခန္ဓာကိုယ်ဟာ စက်ကြီးတခုလို စတင်နှိုးလာနေပါပြီ။စိတ်ကို ထပ် တည်ငြိမ်အောင်လုပ်ပြီး ငါဘာဖြစ်နေတာလဲ။ ငါ့စိတ်ဂယောင်ချောက်ခြား ဖြစ်နေသလား အထပ် ထပ် စစ်ပါတယ်။ အလွန်အေးချမ်းနေပါတယ်။ ဘာပူပင်မှုမှ မရှိတာသေချာလှပါတယ်။ စိတ်ကူး ထဲမှာ ဆက်မှတ်မှဆိုတဲ့ အတွေးပေါ်လာပါတယ်။ ကုတင်ပေါ်ကိုထိုင်မိနေပါပြီ။ကျနော်ဟာ အရာရာကို သိစိတ်မပြတ်ရှိနေပါတယ်။ နှာဝကလေကို မပြတ်အောင် မှတ်နေပါတယ်။ ခါတိုင်းလို ဘုရားရှိခိုးမေတ္တာ ပို့ပြီး လေ့ကျင့်ခန်းဆင်းနေတာ မဟုတ်ဘူး။
ရုတ်တရက် ကုတင်စွန်းမှာ ထိုင်မိနေတာပါ။ကျနော့်စိတ်ဟာ အပြင်ကော အတွင်းကိုပါ ကောင်းစွာ သတိရနေပါတယ်။ အဲဒီအချိန်မှာ ရုတ်တရက်ဆိုသလို ကျနော့်ခန္ဓာကိုယ်ရဲ့ အလယ်ခေါင် တည့်တည့်ကနေ အာရုံတန်းတခု ထိုးထွက်လာနေပါပြီ။ တိတိကျကျ ပြောရရင်ကျောဖက် အောက် နားကျကျ နေရာကနေ ထွက်လာနေပါတယ်။ ရင်ညွန့်ဆီကိုတက်လာတယ်။ ခေါင်းဆီကို ရောက်လာတယ်။ နောက် အဲဒီအာရုံဟာ ငယ်ထိပ်တည့်တည့်ကနေ အလင်းထက်မြန်တဲ့ အရှိန်တခုနဲ့ အထက်ကောင်းကင်ယံကို တက်သွားပြန်ပါ တော့တယ်။ဒီတော့ ကျနော်ဟာ အမည်မသိ ယာဉ်တခုပေါ်ကို ရောက်နေတယ်လို့ ခံစားလာရတာနဲ့ အောက်ဖက် ကိုအသာငုံ့ကြည့်မိပါတယ်။ လားလား။ သေချာပါတယ်။ ကျနော်ဟာ ယာဉ်တခုပေါ်ကိုရောက်နေပါရော့လား။အဲဒီ ယာဉ်ဟာ ငြိမ့်နေအောင် ခရီးနှင်နေတဲ့အတွက် ရွေ့နေမှန်းကို မသိနိုင်လောက်အောင် ဖြစ်နေပါတယ်။ အသိစိတ်က အဆက်မပြတ်တဲ့အတွက် ဘယ်လိုယာဉ်လဲလို့ စိတ်ထဲက ငုံ့ကြည့်မိလိုက်ပါတယ်။ ကျနော်ဟာ ရွှေအိုရောင် ယာဉ်တစီးပေါ်ကို ရောက်နေပေါ့လားဗျာ။
ကျနော်စီးနင်းလိုက်ပါနေတဲ့ ယာဉ်ရဲ့ထိပ်ပိုင်းဟာ သင်္ဘောဦးပုံစံဗျ။ကျုပ်လည်း ထိပ်ပိုင်းကိုသာ ကြည့်မိတယ်။ နောက်ပိုင်းဖက်ကို ဘာရယ်ကြောင့်မသိ လှည့်မကြည့်ဖြစ်ခဲ့ဘူး။ ကျနော်ကလား၊ မတ်တတ်ရပ်လျက်ဗျ။ ရွှေအိုရောင် ထိပ်ပိုင်းဟာ ချောမွတ်မနေဘူး။ ရွှေအတုံးအခဲလိုက်ကြီးလိုပါပဲ။ လက်ရာခပ်ကြမ်းကြမ်းလို့ ပြောရ မလား။ မော်ဒန်ဒီဇိုင်း ဖော်ထားလေသလားတော့ ကျုပ်မသိ ဘူး။ ဗြုတ်ထနေသလိုလို အကွက်ဖော်ထား သလိုလိုနဲ့၊ သေချာတာက အရောင်တင်ထားသလို မဟုတ်ပဲ အော်ရီဂျင်နယ် ရွှေတုံးကြီးလိုဗျာ။အင်း ဒရိုင်ဘာပါမပါလည်း ကျနော် မစပ်စုမိလိုက်ဘူး ဗျ။
ယာဉ်ဟာ လက်ဝဲဘက် အောက်ဖက်ထောင့်ကနေ လက်ယာဘက် အပေါ်ထောင့်ဖက်ကို ခရီးနှင်နေလေရဲ့။ ကျနော်က ရှေ့ဖက်ကို သတိထားကြည့်လိုက်တော့ မှောင်တယ်လို့လည်းမဆိုသာ လင်းလှတယ်လို့လည်း မပြော နိုင်တဲ့ အခြေအနေတခုမှာ ခရီးဆက်နေတယ်ဗျာ။မကြာမတင် အချိန်တခု မှာပဲ ကျနော့် ရှေ့တည့်တည့် ခပ်ဝေးဝေး နေရာတခုမှာ မာကျူရီမီးရောင်လို ခပ်မှိန်မှိန် အလင်းရောင်လေးတွေကို စတွေ့ပါတော့တယ်။ ကျနော်စီးနင်းလိုက်ပါ နေတဲ့ ယာဉ်ရဲ့ဘယ်ညာ နှစ်ဖက်စလုံးမှာဗျ။ ဘယ်ညာစီတန်းပြီး ရှိနေတဲ့ မီးရောင်လေးတွေကို မြင်နေတာ။ တဖြည်းဖြည်း နီးလာလေ။ ကျနော်လည်း ငါဘယ်ရောက်နေသလဲ သိချင်လေဆိုတော့ သေချာသတိထားပြီး ဆက် ကြည့်နေတယ်။ တခုထူးဆန်းတာက ကျနော့်စိတ်ထဲမှာ ဘယ်လိုမှ မနေဘူးဗျ။ဆိုလိုတာက ကြောက်တာ ။စိတ်လှုပ်ရှားတာတွေ မရှိဘူး။
အတော်အတန်နီးလာတဲ့အခါ အဆောက်အဦး တချို့ကို တွေ့လာရပါတယ်။ အလင်းရောင်နဲ့သာမှန်းနိုင် တဲ့ အနေ အထားပါ။အနီးကပ် စေ့စေ့စပ်စပ် ကြည့်လို့မရနိုင်ဘူး။ ကျနော့်စိတ်ထဲမှာ သေချာမှတ်ထားအုံးမှလို့ စိတ်ကူး ပေါ်လာတာနဲ့အဆောက်အအုံ ဒီဇိုင်းကို ခန့်မှန်းကြည့်ပါတယ်။ နန်းတော်လိုလို ၊မန္တလေးက သုဓမ္မာဇရပ်တွေလိုလို ၊ကုရဝိတ်ဖောင်ရဲ့ အပေါ်ပိုင်းလိုလိုပဲဗျာ။ ဘယ်ဖက်မှာ တဆောင် ညာဖက်မှာ နှစ်ဆောင် ။ဖန်သားမှန်သားတွေနဲ့ ဆောက်ထားလို့ ကျနော့်အမြင်မှာ ကွဲအောင်မကြည့်နိုင်တာလည်းဖြစ်နိုင်တယ်ဗျ။ ကျနော့်စိတ်ဟာ ခရီးစဉ် တလျှောက်လုံး အသိမကင်းပဲ ကောင်းစွာသတိရနေပါတယ်။ အဲဒီ အဆောက်အဦတွေကို ကြည့်နေရင်းနဲ့ပဲ အချိန် ဘယ်လောက်ကြာတယ်ဆိုတာ ဘယ်လိုမှမပြောနိုင်ပါဘူး။
ကျနော် ဘယ်လို ပြန်ရောက်လာတယ်၊ ဆိုတာလည်း မပြောနိုင်ပါဘူး။ကျနော်ဟာ ရဲဘက်စခန်း ဧည့်ထောင်မှူး တွေအတွက် သီးသန့်ထားတဲ့ ပင်မစခန်းဧည့်ဆောင်နဲ့တွဲရက် ကျနော် အိပ်တဲ့အခန်းထဲက ကုတင်ပေါ်ကို ပြန်ရောက်နေပါတယ်။ အပြင်မှာနေညိုနေပါပြီ။
ကျနော်အံ့သြတာ တခုရှိသေးတယ်။ ကျနော်နေတဲ့အခန်းဟာ လူသွားလမ်းနဲ့ခဲတပစ် မဝေးဘူးဗျ။ စခန်းက အကျဉ်းသားနဲ့ ဝန်ထမ်းတွေ ငါးရာဝန်းကျင် ရှိတဲ့စခန်း။ အဆောင်က ပင်မဧည့်ခန်းဆောင် တံခါးတွေ အားလုံး ဖွင့်ထားတယ်။ ကျနော့်အခန်းကလည်း သံဇကာတွေတပ်ထားလို့ အပြင်ကနေ ဒိုးယိုပေါက်နီးပါး မြင်နေရတဲ့ အနေ အထား။ နောက်တော့ နေ့ခင်းကြောင်တောင်ကြီး ကျနော် တပ္ပလင်ခွေ၊လက်နှစ်ဖက်ကိုထပ်ပြီး မျက်လုံးမှိတ်ထားပြီး အချိန်အကြာကြီး ငုတ်တုတ်မေ့၊ ငြိမ်နေတာကို ဘယ်သူကမှ သတိမထားမိကြဘူး ထင်ပါရဲ့ဗျာ။ သတိထား ကြည့်မိတော့ဘေးလမ်းမှာ လူသံသူသံတွေနဲ့ ကိုယ့်အလုပ်ကိုယ်လုပ်နေကြတာပဲ။ နေမိဘုံခန်းပျို့တောင် သတိရ စရာ ကောင်းသေးရဲ့ဗျာ။အမေရိကန်တို့၊ရုရှတို့က ကမ္ဘာကျော်သူဌေးတွေ ထက်အာကာကြီးအပြင်ကို စင်္ကြဝဠာ ခရီးနှင်တာ ဒေါ်လာသန်းနှစ်ဆယ် သုံးဆယ်ကုန်သတဲ့။ ကျနော်ကတော့ တပြားမှ မကုန်ပဲ ဘယ်နေ ရာမှန်း မသိတဲ့နေရာကို ဘာမှန်းမသိတဲ့ ယာဉ်တစီးနဲ့ ဘာအဆောက်အဦးတွေမှန်း မသိတဲ့နေရာ ကိုရောက်ခဲ့သဗျာ။ ရောက်တာမှ အိပ်နေတုန်းလည်းမဟုတ် တရားထိုင်နေတုန်းလည်း မဟုတ်။ သတိလွတ်နေတဲ့ အချိန်လည်း မဟုတ်။တော်တော့်ကို စဉ်းစားရကြပ်တဲ့ အဖြစ်ပါပဲ။ ရူးလို့ လျှောက်ပြောနေတယ်လို့ အပြောခံရမဲ့ အဖြစ်ဗျ။ကဲ ခင်ဗျားလည်း ကျနော်ရူးနေတာ မဟုတ်ရင် နတ်ပြည်ရောက်ခဲ့တယ် ထင်မှာပဲမဟုတ်လား။ ဒါကို ခဏထားပါဗျာ။ ဒီကိစ္စဖြစ်ပြီးတဲ့နောက် ကျနော့်ရဲ့အတွေးအစဉ်မှာ တိကျတဲ့အဖြေတခုကို ထုတ်နိုင်ဘို့ လိုလာပါတော့တယ်။ငါ ဘယ်ကို ရောက်ခဲ့တာလဲ ။ ဘာကြောင့်ရောက်ခဲ့သလဲ။ဘယ်သူက ဘယ်လို အကြောင်းကြောင့် ပို့ခဲ့သလဲ။ ဘာကြောင့် အရှင်လတ်လတ် သိစိတ်မကွာပဲ ရောက်ခဲ့တာလဲ။ မေးခွန်းတွေကတော့ မဆုံးနိုင်တော့ပါဘူး။ နတ်ပြည်ရောက်ရအောင်၊ ပို့ရအောင်လည်း ကျနော်ဟာ နတ်ရွာနတ်ဂတိကိုဘယ်တုန်းကမှ မတောင့်တခဲ့ဘူး။ ဘယ်တောင့်တမလဲ ၊နတ်ပြည်ဘယ်နေရာ ရှိတယ်။ တကယ်ကော ရှိမရှိ ကျနော်မှ မသိပဲ။ ကျနော်လေ့ကျင့်ခဲ့တာ ကလည်း အဲဒီလိုနေရာမျိုး ရောက်ဘို့၊ ရောက်အောင် မရည်ရွယ်ခဲ့ဘူး။ ကုန်ကုန်ပြောရရင် ကျနော်လေ့ကျင့်ခန်း မဆင်းခင် ရွတ်ဆိုတဲ့ဘုရားရှိခိုးထဲမှာ တောင်နတ်ပြည်ရောက်ရပါလို၏ လို့မပါဘူး။ ခင်ဗျား ရွတ်ကြည့်၊ခင်ဗျားဆိုတဲ့ သြကာသနဲ့ကျနော်ဆိုခဲ့တဲ့ သြကာသ အတူတူပဲ။လူတိုင်း ရွတ်နေ ဆိုနေကျ သြကာသပါပဲ။ ဘာတဲ့ မဂ်တရား၊ ဖိုလ်တရား နိဗ္ဗာန်တရားတော်မြတ်ကို ရ ရ ပါလို၏ တဲ့။ ဒါပဲ ဘယ်မှာ နတ်ပြည်ပါလို့လဲ။ ထား၊ နေအုံးဗျ။ ဒီ ဆုတောင်းလည်း ကျနော်ရွတ်သာ ရွတ်ခဲ့တာ အဲဒီ မဂ်တို့ဖိုလ်တို့ ရဘို့ဆိုတာ ကျနော့် စိတ်ထဲ မရှိရိုး အမှန်ဗျ။ ကျနော့်ဘဝ ပူလောင်တယ်။ အေးငြိမ်းတဲ့ ဘဝကို ရချင်တယ်။ ကျနော်လုပ် ရမယ်ဆိုတဲ့ အလုပ်ကိုလုပ်တယ်။ လေ့ကျင့်ရမယ် ဆိုတာကိုသာလေ့ကျင့်တယ်။ တကယ် လုပ်တယ်။ ပြင်းပြင်းထန်ထန်ကြီးလို့တောင် တကယ်တမ်း မပြောနိုင်လောက်သေးဘူး ထင်ပါ့ဗျာ။ ခင်ဗျားမှတ်မိပါလိမ့်မယ်။ ကျနော်ပြောဖူးတဲ့ ဗြဟ္မာ့ပြည်တို့၊ ဘဝပေါင်းများစွာတို့၊ ရုက္ခစိုးတို့ တစ္ဆေ တို့၊အသူရကယ်ဘုံတို့ ဘိုးမင်းခေါင်၊ဘိုးဘိုးအောင် ဆိုတာတွေကို ကျနော့်အာရုံမှာ အကြိမ်ကြိမ် ကြုံခဲ့ရပါတယ်။
ဒါတွေကို ကျနော် လက်မခံခဲ့ဘူး။ ထင်ရာမြင်ရာတွေလို့သာ ကျနော်သဘောပိုက်ခဲ့တယ်။အခု နတ်ပြည်လိုလို လာပြန်တယ်။သို့သော် အရင်လို အိပ်မပျော်ခင် အချိန်မျိုးတွေ အားကောင်းကောင်း နဲ့ ရှုမှတ်နေချိန်မျိုးတွေမှာ မဟုတ်တာမို့ အတည်ပြုဘို့ ခက်ခဲလှပါတယ်။ စဉ်းစားလေ၊ ကြပ်လေ ရှေ့ဆက် စဉ်းစားမရလေပါပဲ။ ခင်ဗျားပြော ချင်တာ ရှိလိမ့်မယ်။ ဒါများဗျာ။ သူတော်ကောင်း တရားလုပ်လို့ နတ်ပြည်ပို့တာပဲလို့ ၊အင်း..၊ဒီလို ထင်ရာလွယ်လွယ် ဆွဲတွေးပြီး ကျနော်ဗုဒ္ဓဘာသာ အမည်ခံခဲ့တာ အသက်ငါးဆယ် ပြည့်တော့မယ်။ ဒီလမ်းကို ပြန်မလိုက်ပါရစေ နဲ့တော့၊ ကျနော့် ဥာဏ်မှာ တကယ်ရှင်းမှ အယူအဆတစ်ခုကို လက်ခံတော့မယ်လို့ ကျနော် ပိုင်းဖြတ်ထားခဲ့ပြီ ဗျာ။ကျနော်သူတော်ကောင်း ဖြစ်ပါပြီလို့ ဘယ်လိုပိုင်းဖြတ်နိုင်မလဲဗျာ။ဖြစ်ပျက်ကိုတောင် တိတိကျကျ နားမရှင်း သေးတဲ့အချိန်လေ။နောင်အချိန်အတော်ကြာမှ ဖြစ်ပျက်ဆိုတဲ့အရာဟာ ကျနော်နဲ့အနီးဆုံး နေရာမှာ ကာလအကြာ ကြီး ကတည်းက ရှိနေခဲ့ပါလားဆိုတာ နားရှင်းခဲ့ပါတော့တယ်”
ကိုသက်ခိုင်၏ စကားတန်းရှည်ကြီး ပြီးဆုံးချိန်တွင်ကား နေအတော်စောင်းခဲ့ပြီ။ ငှက်တချို့ပင် အိပ်တန်း ပြန်ကြပြီ။ နှစ်ဦးသား အတွေးကိုယ်စီနှင့် လှေငယ်ကို တက်ကိုယ်စီဖြင့် လှော်ခတ်ရင်း စခန်း ခွဲရှိရာ သို့ ပြန်ခဲ့ကြပါသည်။
(ဆက်လက်ဖော်ပြပါမည်။)
ရုပ်ပုံ။ ။ ဂူဂဲလ်