၃၀ ဇွန် ၂၀၁၆ နေ့ထုတ် သည်ဗွိုက်ဒေးလီးနေ့စဉ်သတင်းစာမှ။ ။
“မလော်ထိုက်၏၊လော်ထိုက်၏။လော်ကျိုးနပ်၏၊မနပ်၏”
(မင်းဒင်)
(၁)
“လော်”ဆိုတာဟာ၊(Lobby)ဆိုတဲ့အင်္ဂလိပ်စကားလုံးကိုမြန်မာစကား
အသံထွက်နဲ့အတိုချုံ့ထားတာပါ။
(Lobby)n, အခန်း။ဧည့်သည်စောင့်ခန်း။
(The Lobby) ဥပဒေပြုလွှတ်တော်အမတ်များ၊မဲဆန္ဒရှင်စသည်တို့နှင့် တွေ့ဆုံသည့်အခန်း။
v.t.ဥပဒေပြုလွှတ်တော်တွင်၊အမတ်များထောက်ခံရန်သြဇာသုံးသည်။
(Lobbylist) n,ထိုသို့သြဇာသုံးသူ။ လို့မော်ဒန်အင်္ဂလိပ်မြန်မာအဘိဓာန်မှာဖွင့်ဆိုပါတယ်။
အခုလိုမီဒီယာခေတ်ကြီးမှာတော့၊ကိုယ့်ပါတီ၊ကိုယ့်အစုအဖွဲ့၊ကိုယ့်အုပ်စု ဘက်ပါအောင်သြဇာတခုခုသုံးပြီးဆွယ်တရားဟောသူ၊ရေးသူတွေကို
လော်ဘီလို့ခေါ်ဝေါ်သုံးစွဲနေကြတာပါပဲ။
ဒါ့အပြင်လူတစ်ဦးချင်းစီအနေနဲ့သူတို့ရဲ့အားသာချက်တခုခုကိုအကြောင်းပြုပြီး၊
သူတို့အယူအဆအတွေးအခေါ်ခံယူချက်စတာတွေကို
ဖွင့်ဟပြောဆိုရေးသားသူတွေကိုလည်းကိုယ့်ကိုယ်ကိုယ်လော်ဘီလုပ်
တယ်လို့သုံးနှုံးလာကြတာကြောင့်၊လော်ဘီဆိုတဲ့စကားလုံး
ဟာနိုင်ငံရေးနယ်ပယ်ထဲကနေ၊အများပြည်သူရဲ့နေ့စဉ်ဘဝဆီကို
ခုန်ထွက်လာပါတယ်။
အစိုးရအပါအဝင်နိုင်ငံရေးပါတီတွေဟာ၊ သူတို့လုပ်ရပ်၊ခံယူချက်၊ အတွေးအခေါ်တွေမှန်ကန်ကြောင်း သတင်းစာ ၊ဂျာနယ်၊ရေဒီယို၊ရုပ်မြင်သံကြား အစရှိသည်တွေကိုအသုံးပြုပြီးတွင်တွင်ကြီးလော်ဘီလုပ်ကြတယ်။
ထို့အတူပဲ၊လူတစ်ဦးချင်းစီဟာလည်း၊သူတို့စိတ်သန်ရာ၊နှစ်သက်
ခုံမင်ရာကိုဖေ့စ်ဘွတ်လိုလူမှုသတင်းကွန်ယက်အားကိုးနဲ့ မြိုင်မြိုင်ကြီး
လော်ဘီလုပ်ကြတယ်။ဒီတော့ကျွန်တော်တို့ရဲ့နေ့စဉ်ဘဝဟာ
လော်ခြင်းမျိုးစုံကြားကိုလုံးလုံးလျားလျားကျရောက်သွားရပါတော့တယ်။
သူလည်းလော်တယ်။ကိုယ်လည်းလော်တယ်။စာနဲ့ရေးပြီးလော်တယ်။
ဓာတ်ပုံတင်ပြီးလော်တယ်။ဗီဒီယိုဖိုင်တင်ပြီးလော်တယ်။
သူ့ရုပ်ရည်လှကြောင်း၊ဟင်းချက်ကောင်းကြောင်းလော်တယ်။
ဆိုင်ကြီးကနားကြီးမှာစားနိုင်ကြောင်း၊ဟိုတယ်ကြီးကြီးမှာ
တည်းနိုင်ကြောင်းလော်တယ်။မိမိတော်ကြောင်း၊မိမိသားသမီးတွေ
တော်ကြောင်းတတ်ကြောင်းလော်တယ်။
လက်လှမ်းမမီသူတွေကလည်းဘဝသမားပါခင်ဗျားဆိုပြီး၊မြို့မေတ္တာကို
လော်တဲ့နည်းနဲ့ချူတယ်။ပြောင်သလိုလိုလော်တယ်။ခနဲ့တဲ့တဲ့လော်တယ်။
သရော်ပြီးလော်တယ်။လူမှုကွန်ယက်အားကောင်းတဲ့ကာလမို့
လော်နည်းတွေကတော့ရေးပြလို့မကုန်နိုင်အောင်ပါပဲ။
ခေတ်ရေစီးကြောင်းကြီးမို့လူတစ်ဦးချင်းကိုယ့်ကိုယ်ကိုလော်တဲ့ကိစ္စကို
ကျွန်တော်တို့ဘာမှဝေဖန်လွန်ဆန်လို့မရနိုင်ပါဘူး။
(၂)
(၂၀၁၀)ဒီမိုကရေစီရွေးကောက်ပွဲမတိုင်မီကာလများကတော့စစ်တပ်ဟာ
အစိုးရပါပဲ။ဒါကြောင့်အဲဒီအချိန်ကာလ တွေမှာစစ်တပ်နဲ့အစိုးရအကြား
လော်ဘီစစ်ပွဲမရှိခဲ့ပေမဲ့၊(၂၀၁၂)ကြားဖြတ်ရွေးကောက်ပွဲအလွန်မှာတော့၊
အတိုက်အခံပါတီကြီးနဲ့သူ့ကိုထောက်ခံတဲ့လူထုဟာ၊မီဒီယာလွတ်လပ်ခွင့်ကို
အားပြုပြီး၊စစ်တပ်နဲ့အစိုးရကိုအာခံတဲ့အခါ၊ စစ်တပ်နဲ့အစိုးရကလည်း
ေ လ်ာဘီနည်းသုံးပြီးတုန့်ပြန်ရာကနေမြန်မာ့နိုင်ငံရေးလူမှုကွန်ယက်လော်ဘီ
စစ်ပွဲစတင်လာပါတယ်။
(၂၀၁၆)ရွေးကောက်ပွဲအပြီးအတိုက်အခံပါတီအနိုင်ရလာတဲ့အခါမှာတော့၊
အာဏာရအစိုးရနဲ့သူ့ကိုထောက်ခံသူတွေကတဖက်၊ရှုံးနိမ့်သွားတဲ့ပါတီနဲ့
စစ်တပ်ကတဖက်၊ပြင်းထန်တဲ့လော်ဘီစစ်ပွဲကြီးဖြစ်ပေါ်လာခဲ့ပါတော့တယ်။
အတိုက်အခံပါတီဟာကြပ်တည်းကျဉ်းမြောင်းတဲ့အခြေအနေကနေ၊
အစိုးရဟောင်းကိုလူထုဆန္ဒမဲအသာစီးနဲ့ဖြုတ်ချနိုင်ခဲ့တာမို့၊လူထုအများစုဟာ
အစိုးရသစ်ကိုထောက်ခံကြောင်းပေါ်လွင်ပါတယ်။
ဒီတော့လော်ဘီစစ်ပွဲဟာ၊ပြည်သူလူထုနဲ့စစ်တပ်ရင်ဆိုင်တွေ့တဲ့အသွင်ကို
ဆောင်လာပါတယ်။စစ်တပ်ဟာနိုင်ငံတကာအဆင့်ရှိတဲ့၊နည်းပညာရှင်တွေ
ကိုလေ့ကျင့်မွေးမြူပြီးလော်ဘီစစ်ပွဲကိုမီးကုန်ယမ်းကုန်ဆင်နွှဲနေတယ်လို့
တောင်၊သတင်းတွေထွက်ပေါ်ခဲ့ပါတယ်။
ပြင်းထန်လှတဲ့နှစ်ဖက်လော်ဘီစစ်ပွဲမှာ၊နှစ်ဖက်စလုံးဟာမောင်နဲ့နှမ၊
သားနဲ့အမိ၊မကြားဝံ့မနာသာဆဲနည်းမျိုးစုံကိုသုံးလာကြတယ်။
ပုဂ္ဂိုလ်ရေးဇောင်းပေးတိုက်ခိုက်မှု၊သတင်းမှားများဖန်တီးလွှင့်ထုတ်မှု၊
အထောက်အထားဓာတ်ပုံတွေကိုဖိုတိုရှော့ခေါ်နည်းပညာနဲ့ပြင်ဆင်တင်ပြမှု၊
စတဲ့မရိုးမသားလုပ်ရပ်မြောက်များစွာပါဝင်လာ တာကဖြင့် ၊မြန်မာ့လူမှုအသိုင်းအဝန်းအတွက်၊အင်မတန်အရှက်ရစရာ၊
ဝမ်းနည်းစရာကောင်းလှပါတယ်။
ဘယ်ဘက်ကလွန်တယ်၊မှားတယ်ဆိုတာ၊အများကဆုံးဖြတ်ရမဲ့အရာမို့၊
ဒီဆောင်းပါးမှာကျွန်တော်အသေးစိတ်မဆန်းစစ်လိုတော့ပါဘူး။
အတိုချုပ်အားဖြင့်တော့ကျောထောက်နောက်ခံအင်အားအခိုင်အမာပေးထား
ခံရပြီး၊၊တသွေးတသံ၊တမိန့်နဲ့ယဉ်ပါးနေတဲ့၊ဘက်က၊စိတ်ကြိုက်လက်နက်
မျိုးစုံနဲ့မီးကုန်ယမ်းကုန်ပစ်ခတ်တိုက်ခိုက်ခွင့်ရတာပါပဲ။
အဆိုးဆုံးကတော့၊အကဲဆတ်လှတဲ့၊လူမျိုးရေး၊ဘာသာရေးခေါင်းစဉ်ကိုနိုင်ငံရေးလော်ဘီအတွက်လက်နက်အဖြစ်ထုတ်သုံးလာတဲ့ကိစ္စပါပဲ။
(၃)
တကယ်တော့စစ်တပ်ဆိုတာနိုင်ငံနဲ့လူထုအတွက်မှီခိုပုန်းအောင်း
လဲလျောင်းရာဖြစ်ခဲ့ရင်အကောင်းဆုံးပါပဲ။လက်ရှိပကတိအနေအထားအရ၊
အကြောင်းကြောင်းသောအကြောင်းကြောင်းတွေကြောင့်မြန်မာ့စစ်တပ်
ဟာမြန်မာ့နိုင်ငံရေးလောကိုအပြီးတိုင်စွန့်ခွာနိုင်ခြင်းမရှိသေးပါဘူး။
တိုင်းပြည်တပြည်အတွက်စစ်တပ်ဟာမရှိမဖြစ်တဲ့အရာပါ။
လူထုစိတ်တိုင်းကျတပ်မတော်သစ်တစ်ရပ်ကိုနေ့ချင်းညချင်းပြန်လည်
ထူထောင်ဖို့ဆိုတာလည်းအပြောလွယ်သလောက် အလုပ်ခက်ပါတယ်။ ဒီနေရာမှာ ဇာတ်လမ်းလေးတစ်ပုဒ်ကိုကျွန်တော်ပြောပြချင်ပါတယ်။
ဒုတိယကမ္ဘာစစ်အတွင်းကပေါ့။ဆိုဗီယက်ကိုကျူးကျော်ဝင်ရောက်လာတဲ့
ဟစ်တလာရဲ့နာဇီတပ်တွေနဲ့ရုရှတပ်နီတော်ဟာ၊ဗော်လဂါမြစ်ရဲ့
တဖက်တချက်စီမှာရင်ဆိုင်တွေ့ခဲ့ကြပါတယ်။
ကျူးကျော်လာတဲ့နာဇီတပ်တွေကိုချေမှုန်းရန်အလို့ငှာ၊တပ်နီတော်ဟာ
၊ဗော်လဂါမြစ်ကိုရရာသင်္ဘောတွေနဲ့ဖြတ်ကျော်တိုက်ခိုက်ဖို့၊
အထက်ကနေညွန်ကြားလာပါတယ်။မြစ်တဖက်ကမ်းမှာရှိတဲ့နာဇီတပ်တွေ
ကလည်း၊ဗော်လဂါမြစ်ကိုတပ်နီတော်ဖြတ်ကျော်မလာနိုင်အောင်
အမြောက်ဆံမိုးရွာချပြီး၊ဟန့်တားနေချိန်မှာ၊တပ်နီတော်ဟာ၊
အသက်ပေါင်းများစွာစတေးပြီးဗော်လဂါမြစ်ကိုဖြတ် ကျော်ပါတယ်။
နာဇီအမြောက်ဒဏ်ကြောင့်၊ဗော်လဂါမြစ်ကိုဖြတ်ကျော်နေတဲ့သင်္ဘော
အတော်များများတစစီပျက်စီးနစ်မြုပ်ကုန်ကြတာကြောင့်၊ကမ်းနဖူးမှာ
ကျန်ရှိနေသေးတဲ့တပ်နီတော်ဟာ၊ဆက်ပြီးဖြတ်ကူးဖို့တုံ့ဆိုင်းကုန်ကြပါတယ်။
ဒီမှာတင်ဆိုဗီယက်ကွန်မြူနစ်ပါတီရဲ့အမာခံကေဒါဗိုလ်မှူးတယောက်ဟာ၊
ကမ်းစပ်မှာရှိနေတဲ့၊တဖက်ကမ်းကို ဖြတ်ကူးမဲ့သင်္ဘောတစီးပေါ်ကို
ဣနြေ္ဒရရတလှမ်းချင်းတက်လာပြီး၊တပ်နီရဲဘော်တွေဆီ၊သူတို့မိသားစုတွေက
ပို့လိုက်တဲ့စာအိတ်တွေကိုဝေပါသတဲ့။ကေဒါတပ်မှူးဟာစာအိတ်ပေါ်က
လိပ်စာတွေကို၊နာဇီတွေပစ်လွှတ်လိုက်တဲ့အမြောက်ဆံကနေလာတဲ့
အလင်းရောင်ကိုအားပြုပြီးဖတ်ရင်း၊ဝေပေးသတဲ့ဗျာ။
ကေဒါတပ်မှူးရဲ့လုပ်ရပ်ကိုမြင်တွေ့ရတဲ့တပ်နီတော်တပ်သားတွေဟာ၊
ပထမတော့တွန့်ဆုတ်နေကြပေမဲ့၊မကြာခင်မှာကြောက်စိတ်လုံးလုံးမရှိတော့ပဲ၊
တပ်မှူးအော်ဟစ်ဝေငှနေတဲ့လိပ်စာတွေမှာကိုယ့်နာမည်ပါလိုပါငြား
နားစိုက်ထောင်ရင်း၊ဗော်လဂါမြစ်ကိုအောင်မြင်စွာဖြတ်ကျော်နိုင်ခဲ့ပါသတဲ့။
(၄)
အဲဒီတိုက်ပွဲမှာနာဇီတွေရဲ့အမြောက်ဆန်တည့်တည့်ထိမှန်ပြီး၊ဒဏ်ရာ
အပြင်းအထန်ရထားတဲ့၊ဆက်သွယ်ရေးတပ်သားရဲဘော်တယောက်ဟာ
တိုက်ပွဲနဲ့မလှမ်းမကမ်းကဆေးရုံကိုရောက်လာပါတယ်။တကိုယ်လုံး
ဒဏ်ရာဗလဗွရထားတဲ့အဲဒီရဲဘော်ဟာ၊ဘယ်နည်းနဲ့မှအသက်မရှင်နိုင်တော့ဘူး။
မကြာခင်အသက်ပျောက်တော့မယ်လို့၊ဆရာဝန်ကြီးတွေကိုယ်တိုင်
ဆုံးဖြတ်ခဲ့ကြပါတယ်။
ဒါပေမဲ့အဲဒီရဲဘော်ဟာထူးဆန်းစွာအသက်မထွက်တဲ့အပြင်၊သူ့တကိုယ်လုံးမှာ၊
တခုတည်းသောလှုပ်ရှားနိုင်တဲ့အရာဖြစ်တဲ့လက်ညှိုး၊လက်ခလယ်နဲ့
မွေ့ယာကိုမနားတမ်းဒလစပ်ဖိရိုက်နေပါသတဲ့။ဒီလိုနဲ့စက္ကန့်ပိုင်းအတွင်း
အသက်ပျောက်သွားရမဲ့လူနာဟာ၊နောက်တနေ့အထိဆက်လက်
အသက်ရှင်နေပါသေးတယ်။ဘာကြောင့်သူအသက်မထွက်နိုင်တာလဲဆိုတာ၊
ဘယ်ဆရာဝန်မှအဖြေရှာမရခဲ့ကြပါဘူး။
အဲဒီအချိန်မှာပဲဆက်သွယ်ရေးတပ်ကအရာရှိတယောက်၊အဲဒီလူနာကို
လာကြည့်ပါတယ်။အရာရှိဟာအဲဒီရဲဘော် ရဲ့လက်ညှိုးလက်ခလယ် လှုပ်ရှားနေပုံကို၊သေချာလေ့လာအကဲခတ်ရင်း၊ခဏကြာတော့
တစုံတခုကိုသဘောပေါက်သွားဟန်နဲ့၊အဲဒီရဲဘော်ရဲ့လက်ညှိုးနဲ့
လက်ခလယ်ကြားကိုသတ္တုမီးခြစ်တလုံးညှပ်ပေးလိုက်ပါတယ်။
တဆက်တည်းဆိုသလိုအဲဒီသတ္တုမီးခြစ်အောက်တည့်တည့်မှာ
သစ်သားပြားအမာတချက်ကိုခံထားပေးလိုက်ပါတယ်။
အဲဒီအခါ မီးခြစ်ကိုယ်ထည်နဲ့သစ်သားပြားရိုက်သံဒတ်၊ဒတ်၊ဒတ်ဒတ်ဒတ် ဆိုတဲ့အသံတွေပီပီသသထွက်ပေါ်လာပါသ တဲ့။
အဲဒီတဒတ်ဒတ်အသံတွေဟာ၊အဝေးပြောကြေးနန်းရိုက်တဲ့မော့စ်
သင်္ကေတတွေဖြစ်နေပါသတဲ့။သူပို့နေတဲ့ သတင်းစကားကတော့..၊ “စစ်ကူပို့ပါ။တပ်နီတော်အောင်ပွဲခံဖို့နီးပြီ”လို့အဓိပ္ပါယ်ရပါသတဲ့။
ဒီတော့ဆက်သွယ်ရေး အရာရှိဟာ၊လူနာရဲဘော်ရဲ့လက်ကြားက သတ္တုမီးခြစ်ကိုအသာဖြုတ်ယူပြီး၊သစ်သားပြားမှာ…တဒတ်ဒတ်ခေါက်ရင်း
“သတင်းပေးပို့ချက်ကိုရရှိတယ်။တပ်ကူပို့လိုက်ပြီ”ဆိုတဲ့မော့စ်သင်္ကေတ
ပြန်ရိုက်လိုက်တယ်ဆိုရင်ဘဲ၊လူနာရဲဘော်ဟာ၊ ချက်ချင်းဆိုသလိုငြိမ်ကျပြီးအသက်ပျောက်သွားပါရောတဲ့။
(၅)
ဇာတ်လမ်းဆုံးပြီဆိုတော့၊ခင်ဗျားတို့စိတ်ထဲမှာတပ်နီတော်ကေဒါရဲ့
ရဲဝံ့ပြောင်မြောက်တဲ့နိုင်ငံချစ်စိတ်၊တပ်နီတော်တပ်သားရဲ့နောက်ဆုံး
ထွက်သက်အထိတာဝန်ကျေပွန်မှုစတာတွေကို၊တစုံတခုသော
အတိုင်းအတာအထိတော့ခံစားကြ ရပါလိမ့်မယ်။
တကယ်တော့ကျွန်တော်ပြောခဲ့တဲ့ဇာတ်လမ်းဟာ၊တကယ့်ဖြစ်ရပ်မဟုတ်ပါဘူး။
ဒုတိယကမ္ဘာစစ်အတွင်းတုန်းကဆိုဗီယက်ကွန်မြူနစ်ပါတီအာဘော်ပရာဗဒါ
သတင်းစာမှာဖော်ပြထားတဲ့လော်ဘီဇာတ်လမ်းနှစ်ပုဒ်ကိုဆက်စပ်
ဖန်တီးထားတာပါ။
တပ်နီတော်ကိုလော်တဲ့စာ၊ဆိုဗီယက်ကွန်မြူနစ်ပါတီကိုလော်တဲ့စာပါပဲ။
အဲဒီလော်ဘီဇာတ်လမ်းဟာဘယ်လောက်တောင်အောင်မြင်ခဲ့သလဲဆိုရင်၊
ဒုတိယကမ္ဘာစစ်နောက်ခံရုပ်ရှင်ဇာတ်ကားကြီးတွေမှာတောင်၊ထည့်သွင်း
ရိုက်ကူးခဲ့ရတဲ့အထိပါပဲ။ဆိုလိုရင်းကိုတည့်တည့်ပြောရရင်လော်တဲ့နေရာမှာ
ပညာသားပါပါ၊ရသခံစားနိုင်သည်အထိလော်တတ်ဖို့လိုပါတယ်။
ဗုဒ္ဓ၊ယေရှုခရစ်၊မိုဟာမက်တို့လို့မဟာ့မဟာပုဂ္ဂိုလ်ကြီးတွေတောင်၊မေတ္တာ
တရားနဲ့ယှဉ်တဲ့၊သစ္စာထိုက်တဲ့အမှန်တရားတွေကို၊သူ့နည်းသူ့ဟန်နဲ့လော်
ခဲ့ကြသေးတာမို့၊လော်ဘီခေတ်ကြီးမှာအတ္တမကင်းနိုင်ကြတဲ့
သာမာန်လူတွေ ကိုယ်သန်ရာလော်ကြတာကိုအပြစ်မဆိုလိုပါဘူး။
ဒါပေမဲ့ဆတ်ဆတ်ထိမခံ၊ဥာဏ်နဲ့မယှဉ်ပဲ၊ “စစ်တပ်မရှိရင်ဘာ ဖြစ်သွားမယ်ထင်သလဲ” “အဘကျေးဇူးမြင်းမိုရ်ဦး”စတဲ့နည်းတွေနဲ့လော်။
တဖက်ကလည်းဗိုလ်ချုပ်ကြီးတွေရဲ့ ဓာတ်ပုံတွေတင်ပြီး၊ ငါနဲ့ကိုင်တုတ်ရိုင်းစိုင်းနေကြမယ်ဆိုရင်တော့၊လော်နည်းအမှားလို့သာ
သတ်မှတ်ရပါလိမ့်မယ်။
နိဂုံးချုပ်အနေနဲမြန်မာ့နိုင်ငံရေးလော်ဘီစစ်ပွဲကြီးမှာပါဝင်ဆင်နွှဲနေကြတဲ့၊
ကျင့်သားရအထူးစစ်သည်များ၊အပျော်တမ်း၊စေတနာ့ဝန်ထမ်းလော်ဘီများ
အနေနဲ့၊ကိုယ်လော်နေတဲ့အကြောင်းခြင်းရာဟာ၊ထောက်ကန်ချက်မှန်၏မမှန်၏။
တရား၏မတရား၏။သစ္စာထိုက်၏မထိုက်၏။လော်နည်းမှန်၏၊မမှန်၏။
လော်ကျိုးနပ်၏၊မနပ်၏။ဆိုတာစဉ်းစားဝေဖန်သုံးသပ်စေချင်ပါတယ်။
လော်တိုင်းမပြီးပါဘူး။လော်နည်းမမှန်ရင်၊ကလော်ရာဆော်ရာရောက်ပါတယ်။
အ ချိန်ကုန်၊လူအပင်ပန်းခံပြီးကိုယ့်သိက္ခာကိုယ်ချရာရောက်ပါတယ်။
“လူတွေအားလုံးယုံကြည်သည့်တိုင်၊အမှားဟာအမှားပါပဲ။
တယောက်မှမယုံကြည်ပေမဲ့၊အမှန်တရားဟာအမှန်တရားပါပဲ”